33,7 mlrd teńgeni quraıtyn jańa joba aıasynda «Allur» zaýyty jylyna 30 myń avtokólik shyǵarýdy josparlap otyr. Sondaı-aq joǵary bilikti mamandar úshin 400 jańa jumys orny ashylmaq.
Eske salaıyq, 2022 jyly Qazaqstan men «General Motors» kompanııasy birlesken «Chevrolet» CKD óndirisin qolǵa alý týraly kelisimge kelgen bolatyn. Sál keıinirek, 2022 jyldyń 22 jeltoqsanynda telekópir baılanysyna shyqqan Memleket basshysy Qasym-Jomart Toqaev pen О́zbekstan Prezıdenti Shavkat Mırzııoev atalǵan jobanyń bastalǵanyn resmı málimdegen.
О́nerkásip jáne qurylys mınıstri Qanat Sharlapaev mashına jasaý salasy Qazaqstan ekonomıkasynyń strategııalyq mańyzdy baǵyty bolyp sanalatynyn, al «General Motors» syndy álemniń aldyńǵy qatarly kompanııasyn óndiriske tartý elimizde qarqyndy damyp kele jatqan avtokólik salasyna jańa serpin ákeletinin atap ótti.
«Búgin búkil Qazaqstan óndirisi úshin óte mańyzdy kún. Men «Allur» zaýytynyń qyzmetkerlerine arnaıy alǵys aıtqym keledi. Búgin sizder Qazaqstannyń ındýstrııalyq bolashaǵyna negiz saldyńyzdar deýge bolady. Biz úshin jáne «General Motors» áriptesteri úshin jobany odan ári damytý jáne óndiristiń jergilikti úlesin arttyrý óte mańyzdy», dedi mınıstr.
Jobany iske asyrý úshin tehnologııalyq sheshimder úlgisin usynatyn jáne ónerkásip qurylǵylaryn jetkizýmen aınalysatyn jetekshi kompanııalar tartylyp otyr. «CKD Onix» Qazaqstan úshin ǵana emes, Ortalyq Azııa elderi úshin de biregeı jańa óndiristik keshen bolyp sanalady. Mamandar atalǵan jobanyń iske qosylýy «Allur» zaýytyna Qazaqstan avtokólik ındýstrııasyndaǵy eń joǵarǵy deńgeıde avtomattandyrylǵan kásiporyn mártebesin beretinin aıtady.
Qostanaı oblysynyń ákimi Qumar Aqsaqalov óńirdiń joǵary oqý oryndary men kolledjderi osyndaı iri jobalar úshin bolashaq mashına jasaý mamandaryn maqsatty túrde oqytyp jatqanyn málimdedi.
«Sońǵy 4 jyl ishinde mashına jasaý fakýltetterindegi stýdentter sany 5 ese artty. 2025 jyldyń qorytyndysy boıynsha, kásiporyndarda jumys isteıtin túlekter sany taǵy 2 ese kóbeıetinin baıqap otyrmyz. Bul jastar úshin, elimizdiń bolashaǵy úshin óte mańyzdy», dedi ákim.
«Chevrolet Onix» óndirisinde «General Motors» kompanııasynyń sapa standarttaryna sáıkes keletin joǵary sapaly jáne asa dáldiktegi lazerlik astastyrýdy qamtamasyz etetin robottandyrylǵan lazerlik dánekerleý tehnologııasy qoldanylady. Qazir zaýytta zamanaýı robottandyrylǵan qurylǵylardy paıdalaný arqyly óndiristi avtomattandyrýdyń joǵary deńgeıindegi plastıkti boıaý sehiniń qurylysy júrip jatyr. Sonymen qatar elimizde alǵash ret avtokomponentter shyǵaratyn lokalızasııalyq ortalyqtyń qurylysy bastalady.
«Ekijaqty kooperasııalyq yntymaqtastyq aıasynda biz únemi ósý men óndiris aýqymyn keńeıtý múmkindikterin izdeımiz. «UzAuto», «Allur» jáne «GM» ınvestısııalary men kúsh-jigeriniń arqasynda búgin osy mańyzdy kezeńge – Qostanaıda «Chevrolet Onix» CKD-óndirisiniń bastalýyna qol jetkizdik. Avtokólik óndirisiniń kólemi jylyna 50 myńdy qurap otyr. Qazir Qazaqstan álemdegi «Chevrolet» naryǵynyń kólemi boıynsha jetinshi orynda. Bul bizdiń tabysty seriktestigimizdiń dáleli», dedi «General Motors International» prezıdenti Shılpan Amın.
«General Motors» kompanııasynyń jahandyq naryqtar jónindegi prezıdenti jáne atqarýshy vıse-prezıdenti Rorı Harvı óz kezeginde Qazaqstanda «Chevrolet» avtokólikteriniń sapaly óndirisin qolǵa alyp jatqan ónerkásiptik kooperasııaǵa qatysýshy taraptardyń qajyrly eńbegin joǵary baǵalap, alǵys bildirdi.
2023 jyly «Allur» ınjenerleri «General Motors» zaýyttarynda 8 aı bolyp, arnaıy oqý-tájirıbe kýrsyna qatysyp qaıtqan. «Allur» qyzmetkerleri oqytýdyń barlyq kezeńinen ótti jáne jańa modeldi shyǵarýǵa qajetti bilik-bilimdi tolyq ıgerdi», deıdi zaýyt basshylary.
«Allur» zaýytynyń operasııalyq dırektory Vıtalıı Hrıst jańa joba óńir damýyna oń yqpal etetinin aıtty.
«Byltyr bizdiń zaýyttyń konveıerleri 90 myńnan astam avtokólik shyǵardy. Bul – otandyq avtokólik óndirisindegi rekordtyq kórsetkish. Jańa iske qosylyp otyrǵan «Chevrolet Onix» jobasynyń mýltıplıkatıvti áseri bar. О́ıtkeni mashına jasaý salasynda bir jumys ornynyń qurylýy osy óndiristiń aınalasyndaǵy salalarda bes-alty jumys ornynyń paıda bolýyna yqpal etedi», deıdi Vıtalıı Hrıst.
Qostanaı oblysy
