Jyl basynda Memleket basshysy Qasym-Jomart Toqaev Naýryz meıramyn merekeleýge jańasha kózqaras qajet ekenin atap ótti. Osyǵan oraı jańa nómirde jýrnal betinde Naýryz meıramyna qarasty ǵylymı izdenis pen batyl boljam berildi. Jýrnal qyzmetkeri, jas jazýshy Doshan Jylqybaı «Naýryz batyr jáne túıe jyly» maqalasynda qazaqy tanymdy ǵylymı paıymmen sheber baılanystyra baıandap, tabıǵı kataklızmder sebebin halyq folklory men ańyzdardan izdeıdi. Sondaı-aq Doshan «Kún men túnniń teńelýi» atty ekinshi maqalasynda qazaq halqynyń aspan álemin, tabıǵı qubylystardy názik túsine otyryp, kún raıyn ǵana emes, adamzat bolashaǵyn da sergek paıymdaǵanyn naqty derekter arqyly sıpattaıdy.
«Aq jelken» jýrnalyn 1978-2000 jyldar aralyǵynda 20 jyl boıy basqarǵan, basylymnyń «Pıoner» degen ataýyn «Aq jelken» dep ózgertken qazaqtyń qabyrǵaly qalamgeri, poezııa patshaıymy Farıza Ońǵarsynovanyń týǵanyna bıyl 85 jyl tolady. Osy mereıli dataǵa oraı jýrnal betinde aqyn jaıly ádemi estelikter, súbeli suhbattar, ǵylymı maqalalar jaryq kórdi. Parlament qabyrǵasynda Farıza apaımen ıyqtasa qyzmet istegen qoǵam qaıratkeri Irak Elekeevtiń, aqynnyń sońǵy demi shyǵarda janynda birge bolǵan Zıbagúl Kemeldiń, qalamgerdiń kýrstasy Qadyr Júsiptiń estelikteri jan tebirentedi. Aqynnyń qyzmettes shákirtteri Beısenbaı Súleımenov, Bekzat Omarov, Sáken Sybanbaı, Baýyrjan Ǵubaıdýllın, Darııa Talapova estelikterinde Farıza beınesi adamgershilik, meıirim, kisilik sıpatynan erekshe ashylady. Aqyndar Ońaıgúl Turjan men Elena Ábdihalyqova Ońǵarsynova óleńderin jańasha taldaıdy. Qazaq jerinde aqyn atyn alǵan mektepterdiń tynys-tirshiligi de jýrnal betinde keńinen kórinis tapty.
О́tken jyly «Aq jelken» jýrnaly oqyrmandar arasynda «Qaıtalanbas sát» fotobaıqaýyn uıymdastyryp, jyl sońynda bes jeńimpazǵa baǵaly syılyqtar usynǵan edi. Bıyl da sol dástúr jalǵasyn tabady. Basylym naýryz aıyndaǵy sanynan bastap «Qazaqtyń nar tulǵalary» vıktorınasyn jarııalady. Ár nómirde jyl sońyna deıin mereıtoılary atalyp ótetin qazaq halqynyń asyl perzentteri Q.Sátbaev, Sh.Aımanov, B.Soqpaqbaev, J.Aımaýytuly, Á.Qasteev, t.b. ómir joly men shyǵarmashylyǵyna arnalyp 10 suraqtan turatyn 10 vıktorına beriledi. Eń kóp upaı jınaǵan bes oqyrmanǵa baǵaly syılyqtar, ataýly dıplomdar tabys etiledi. Bıyl da baıqaýǵa Ǵ.Qulahmet atyndaǵy qoǵamdyq qor men MED365 kompanııasy demeýshilik kórsetedi. Naýryz aıyndaǵy vıktorına F.Ońǵarsynovaǵa arnalyp, jas oqyrmandarǵa poezııa patshaıymynyń ómir joly, shyǵarmashylyǵy, jýrnalıstik qyzmeti týraly 10 suraq qoıyldy.
«Aq jelkenniń» shyǵa bastaǵanyna 2025 jyly 100 jyl tolady. Bir ǵasyr boıy qazaq balalarynyń senimdi serigi, aqylshy dosy, turǵylas-syrlasy bolyp kele jatqan basylym aldaǵy ýaqytta da oqyrmandarmen etene tynystap, zamanaýı taqyryptardyń barlyǵyn qamtyp, ár jasóspirimniń esigin qaǵyp turýǵa tyrysady.
