Dástúrge aınalǵan jyr jármeńkesi

Jas júırikter údeden shyǵa alyp, úmitti aqtady deýge bolady. Ǵulamanyń ǵıb­ratty ǵumyry men shejireli sha­hardyń tarlan tarıhyn kádeli jyrlarymen pash etip, aıaq ­alysyn baıqatty.

Bul – dástúrge aınalǵan jyr dodasy. Oblystyq mádenıet, arhıvter jáne qujattama bas­qarmasy jan-jaqty qol­daý bildirip, oblystyq máde­nı-sa­ýyq jáne halyq shyǵarma­­shy­ly­ǵynyń ǵylymı-ádisteme­lik orta­lyǵy men «Arqa» aıtys aqyn­dary men jyrshy-ter­­me­shiler mektebi birlese uıym­dastyrdy.

Aıtystyń resmı saltanatyn ashyp bergen oblys ákimi­niń orynbasary Erlan Qusaıyn kópshilikti Ulys kúni­men qut­tyqtady.

– Kezindegi keńes zamanyn­da biraz dúnıemizden qol úzdik. Ýaǵynda erkimizdi alsa da, eń­semiz túsken joq. Enshimiz­di alsa da, Egemendigimizdi jo­ǵalt­qan joqpyz. О́shkenimiz qaı­ta janyp, ólgenimiz qaı­ta tirildi. Sondaı asyl qazy­na­myz­dyń biri – osy aıtys óneri. Qundylyqtarymyz­ben qaı­ta qaýyshtyq. О́zbek­áli Jánibekovteı arys aza­ma­tymyzdyń qaıratker­ligi­niń arqasynda Naýryz óz deń­geıinde toılana bastady. Endi Memleket basshy­sy Qasym-Jomart Toqaev buǵan tereń maǵyna ústedi. Bıyl áz Naýryz jańasha mánge ıe boldy. Alystyń jaqyndaıtyn, arazdyń tatýlasatyn erek kún­deri bul. Jalpyhalyqtyq sıpatqa ıe bolyp jatqan taǵy­lymy tereń, dástúri desteli Ult merekesi baıandy bolsyn! Aqyndar alqynbasyn! – dedi Erlan Beısenbaıuly.

Jyr jármeńkesine sonaý Túrkııadan rýhanııattyń úl­ken júrekti janashyry, Qazaq­stan ónerine eńbek sińir­gen qaı­ratker, Qaraǵandy obly­sy­nyń Qurmetti azamaty, professor Dúısen Qaseıinov kelip, jas dúldúlderdiń ónerin tamashalap, oń baǵalady.

Aıtysqa endigi elge keńinen tanylyp úlgergen Arqanyń ár tarabynan kelgen aıtyskerler qatysty. Nurmuhammed Baısúgirov, Muhtar Ádilov, Dos­keı Botbaı, Erkeǵalı Bekbo­lat, Nursultan Yrymbaı, Dýman Samatuly, Tórehan Sábet, Nurlybek Tóken, Erǵa­lı Álıhan, Janarys Tileý­bek, Bekarys Ospanov, Qaı­rat Rysmaǵanbet, Syrym Nyǵyz­baı, Jandos Baqytuly sahnaǵa jerebe arqyly shyǵyp, sóz saıys­tyrdy.

Al jas órenderdiń óne­rine aqyn, fılologııa ǵylym­da­rynyń doktory, professor Qoılybaı Asan, qazaq án óne­riniń Ámiresi atanǵan, «Qurmet» ordeniniń ıegeri Ser­jan Musa­ıyn, ǵalym-ustaz Sarjan Takırov, kórnekti pýblısıst, oblystyq «Ortalyq Qazaqstan» gazetiniń bas redaktory Ersin Musabek, aqtanger aqyn, jyrshy-jyraý Dıdar Qamıev baǵa berdi.

Jas dúldúlderdiń dúbiri uzaqqa sozyldy. Olar el ishin­­degi keleńsiz dúnıelerdi tamyr­­shydaı tap basyp aıtty. Taı­salmady da, tosyl­mady da. Sózden de irkilmedi. Álem­ge aty taraǵan ǵalym Qa­nysh esi­min laıyqty ulyq­taı aldy.

Talanttardyń taǵylymdy tirkesterine kórermen kórkem kóńil kúımen qoshemet soǵyp, qıqý qosyp otyrdy. Muny se­zingen jas shaıyrlar aýzymen qus tistep, ot búrkidi.

– «Aıtys – sóz barymtasy» dep zańǵar Muhtar Áýezov aıtyp ketkendeı, sóz saıysynda atalǵan shaıyrlar­dyń bári de tyńnan tirkes, órnek­ti sóz tastady deı alamyz or­taǵa. Aqyndar eldik ózekti dú­nıelerdi ózinshe tápsirledi degen senimdemin, – deıdi aıtys tizginshisi, ádebıetshi ǵalym, «Arqa» aqyndar men jyrshy-jyraýlar mektebiniń basshysy Aıtbaı Jumaǵul.

Aqtyq synǵa qatarlas­tary­nan oq boıy ozyq kó­ringen tórt aqyn top jaryp shyqty. Úshinshi oryndy Jandos Baqytuly men Nursultan Yrymbaı, ekinshi oryndy Syrym Beısembek pen Nurmuhambet Baısúgirov qanjyǵalap, birinshi oryn tu­ǵyrynan Dýman Symbat kórindi. Al aıtystyń qos aına­lymynda da shashasyna shań juqtyrmaǵan jas daryn Erkeǵalı Bekbolat júlde qory 500 myń teńgeni quraǵan bas báıgeni enshiledi.

Qaraǵandy oblysy