Qystan shyqqan aǵaıyn Naýryz onkúndigin erekshe atap ótip jatyr. Bir jaǵynan ulyq merekeniń qasıetti Ramazan aımen sáıkes kelýi de osy merekeniń mánin tereńdetti. Bıylǵy Naýryzdy eldegi sharýa baqqan azamattar muqtaj aýyldastaryna qaıyrymdylyq kómek kórsetýden bastady.
Baıǵanın aýdanynyń ortalyǵy Qaraýylkelde aýdandyq meshit aldynda qaıyrymdylyq kerýeni bastaý aldy. Aýdan kásipkerleri men meshit jamaǵaty jáne eriktilerdiń qatysýymen ótken is-sharada ulyq merekeniń ulylyǵy týraly jaqsy tilekter aıtylyp, aqsaqaldar bata berdi. Qaıyrymdylyq kúni aýdannyń sharýa qojalyqtary múgedek bala tárbıelep otyrǵan, az qamtylǵan otbasylarǵa qoı etin jetkizip berse, kásipkerler, meshit jamaǵaty jáne tájik-aýǵan soǵysy ardagerler qaýymdastyǵy azyq-túlik paketteri men qarjylaı kómek taratty. Baıǵanın aýdanynda qaıyrymdylyq kúni 50 otbasyǵa osyndaı kómek kórsetildi.
Qaıyrymdylyq kúni Shalqar aýdanynyń kásipkerleri de aıanyp qalǵan joq. Aıshýaq aýyldyq okrýginiń «Qýan» sharýa qojalyǵynyń basshysy Rýslan Tastaıbekov aýyldaǵy az qamtylǵan otbasylarǵa 100 myń teńge kóleminde kómek berse, Eset Kótibaruly aýyldyq okrýginiń turǵyny, jeke kásipker Ásemgúl Salyqbaeva múgedektigi bar bala tárbıelep otyrǵan, jumyssyz aýyldasyna azyq-túlik jetkizdi. Shetyrǵyz aýyldyq okrýginiń mekeme ujymy, Shalqar aýdandyq jumyspen qamtý jáne áleýmettik baǵdarlamalar bólimi qyzmetkerleri, jeke kásipkerler A.Noǵaev, Q.Bolysbaeva, G.Nurmanova az qamtylǵan otbasylarǵa «Naýryz dámin» tartý etti.
«Qazaqstan halqyna qoldaý qory» Toǵyz orta mektebiniń jeti oqýshysyna, Aqtoǵaı, Bershúgir, Shalqar aýyldyq okrýgteri azamattary jeti oqýshyǵa jazǵy demalysqa joldama tabystady. Shalqar aýdanynyń bilim bólimi men bilim berý uıymdary mektepterdiń 9-11 synyptar arasynda Naýryz taǵamdaryna jármeńke uıymdastyryp, odan túsken qarjy múgedektigi bar bala tárbıelep otyrǵan otbasyǵa berildi. Bul kúnderi aýdandaǵy muqtaj otbasylarǵa 780 myń teńge kóleminde qaıyrymdylyq is-sharalary jasalsa, 52 otbasyna áleýmettik paketter taratyldy.
Aqtóbelik azamattar qaıyrymdylyq is-sharalaryn Naýryz aıy aıaqtalǵansha jalǵastyra bermek.
Aqtóbe oblysy
