О́reli jas jeke sharýashylyǵynyń qamyn kúıtteýmen ǵana shektelip qalmaı, «Aýyl» partııasynyń atynan saılanǵan aýdandyq máslıhat depýtaty retinde óńir turǵyndarynyń ál-aýqatyn arttyrý, aýyl ınfraqurylymyn jetildirý, mal sharýashylyǵyn damytý máselelerine de ún qosyp júr.
Erboldy oblystyq mádenıet basqarmasynda bas maman bolyp qyzmet etip júrgen kezinen bilemiz. Kóbine óńirde ótip jatatyn túrli mádenı is-sharalardyń basy-qasynan kórinip júretin. 2015 jyly úılenip, otaý quryp týǵan aýyly Teńizge kóship ketti dep estidik. Araǵa eki-úsh jyl salyp kezdeısoq jol túıistirip qaldyq. Inisimen birlesip jeke sharýa qojalyǵyn quryp, sodan beri mal basyn kóbeıtýmen aınalysyp jatqanyn aıtqan. О́zimiz kórgen burynǵy memlekettik qyzmetshi Erbolǵa múlde uqsamaıdy. Qımyly shıraq, sózi de, ózi de ábden ysylǵan kásipker azamatty kórdik.
Mal sharýashylyǵyn qoldaýǵa arnalǵan memleket baǵdarlamasyn tıimdi paıdalana bilgen Erbol bastapqydaǵy 5 bas sıyryn kóbeıtip, búginde iri qara malyn 60-qa deıin jetkizip aldy. Munyń syrtynda 300-ge tarta qoıy bar. Endi mal tuqymyn asyldandyrýǵa den qoıyp otyrǵan sharýa bul iste de memlekettiń kóp kómek berip jatqanyn aıtady.
«Qara malǵa memleket jyl saıyn 10 myń teńgeden sýbsıdııa tóleıdi. Eger sol sıyrdan týǵan tóldi bir jyldan soń et kombınatyna nemese bordaqylaý alańyna tapsyrsam, tiri salmaǵyna 200 teńgeden qosymsha sýbsıdııa beriledi. Men bir buzaýǵa 50-60 myń teńgeden demeýqarjy alyp otyrmyn. Mysaly, bıyl Qarabalyq aýdanyndaǵy bordaqylaý alańyna 7 buzaý ótkizdim. Ortasha salmaǵy 250 kılodan shyqty. Olar ár bastyń tiri salmaǵyn 1 myń teńgeden qabyldap aldy. Al memleket 7 buzaýdy ósirip, ótkizgenim úshin qosymsha 350 myń teńge demeýqarjy berdi. Sonda bir buzaý 300 myń teńgege shyǵyp tur», deıdi E.Qarymsaqov.
Fermer osydan biraz jyl buryn óńirde asyl tuqymdy mal ósirip jatqan iri sharýashylyqtan qazaqtyń eki aq bas buqasyn satyp alǵan. Qazir sonyń nátıjesin kórip otyr. Asyl tuqymdy buqadan týǵan tól erte ósedi, tez et alady. Etti maldy et kombınattary da óz kólikterimen kelip alyp ketedi. Sonymen qatar Erbol 2021 jyly 100 bas asyl tuqymdy qoı satyp alǵan. Bul qoılardyń ereksheligi – qatty aıaz nemese boran bolmasa, qańtar, aqpan aıyna deıin dalada tebindep júre beredi. Sharýa ózi ósirip otyrǵan bir bas asyl tuqymdy qoı úshin memleketten 4 jarym myń teńgeden sýbsıdııa alyp otyr.
Malǵa qazir kóbine sharýanyń ózi men kómekshi baqtashysy qaraıdy. Jumys kúshi tapshy bolǵandyqtan, barlyq iske Erboldyń ózi bilek sybanyp kirisip ketedi.
«О́zim eńbektenip tabys tabatyn jumysty jaqsy kóremin. Qara jumysqa da, tehnıka júrgizýge de úırenip aldym. Shóp tasımyn, shabamyn. Mal da baǵamyn. 35 gektar jerimiz bar, malǵa azyq úshin azdap suly men arpa egemiz. Ony da ózim egip, ózim jınap alamyn. Malǵa shópti traktormen salamyn. Ol da jumysty biraz jeńildetedi. Sýyn qudyqtan qosamyz. Jemin endi óz qolymyzben berýge týra keledi», deıdi fermer.
Erboldyń jubaıy Vanga aýyl mektebinde muǵalim bolyp isteıdi. Mektepten tys ýaqytta úı sharýashylyǵymen qosa, syrttaǵy maldy qaraýǵa da qolǵabys tıgizip úlgeredi. Jas otbasy úıelmeli-súıelmeli úsh bala ósirip otyr.
Teńiz aýylynda búginde 150-ge tarta úı bar, 800-ge jýyq adam turady. Egin salyp mal ósirýmen aınalysatyn 20-dan asa irili-usaqty sharýashylyq jumys istep tur. Sonyń biri – Erbol Qarymsaqovtyń sharýa qojalyǵy. Ákimdiktegi qyzmetinen góri atakásippen aınalysýdy qol kórgen fermerdiń aýyl bolashaǵyna degen senimi zor.
Qostanaı oblysy,
Meńdiqara aýdany,
Teńiz aýyly
