Jańa medısınalyq nysandar EKG, ÝDZ, defıbrıllıator, bıohımııalyq taldaý apparattarymen jáne ózge de zamanaýı qurylǵylarmen jabdyqtalady. Munyń syrtynda atalǵan emdeý mekemelerine naýqasty aýdandyq aýrýhanaǵa aparmaı-aq jergilikti jerde taldaý júrgizýge múmkindik beretin zerthanalyq qurylǵylar ornatylady.
«Medısınalyq nysandardyń ashylýy – shalǵaıdaǵy eldi mekenderdiń turǵyndary úshin qoljetimdi jáne sapaly medısınalyq kómekti qamtamasyz etýdegi mańyzdy qadam. Jańa ambýlatorııalar men FAP-tar bilikti kadrlarmen ǵana emes, sonymen qatar zamanaýı medısınalyq jabdyqtarmen jabdyqtalǵan. Bul aýyl turǵyndarynyń ómir súrý sapasyn edáýir arttyrýǵa jáne azamattarymyzdyń densaýlyǵyn jaqsartýǵa múmkindik beredi», dedi Ershov aýlyndaǵy emdeý mekemesiniń ashylý rásimine qatysqan oblys ákimi Qumar Aqsaqalov.
Jańa medısınalyq nysandar alǵashqy dárigerlik-sanıtarlyq kómek kórsetýge qajettiniń bárimen jabdyqtalǵan. Aýyldyq jerde densaýlyq saqtaý ınfraqurylymynyń aıtarlyqtaı jaqsarýy shalǵaı eldi mekenderdegi turǵyndarǵa der kezinde medısınalyq kómek kórsetý múmkindigine jol ashyp otyr. Emhanalyq kómek kórsetý júıesin jetildirý aıasynda bıyl sáýir aıynan bastap salalyq mamandardyń qabyldaýyna tirkelý joldary da ońtaılandyrylady. Naýqastar qajet bolǵan jaǵdaıda salalyq mamannyń qabyldaýyna jalpy praktıka dárigeriniń joldamasynsyz-aq jazyla beredi.
Oblystyq densaýlyq saqtaý basqarmasynyń málimetinshe, bıyl óńirde dáriger-mamandar men orta medısınalyq qyzmetkerlerdiń sany artqan. Sondaı-aq aýyldyq emdeý mekemelerindegi kadr máselesi de birtindep óz sheshimin taba bastaǵan. Mamandar óńirde ólim-jitimniń de jalpy kórsetkishi tómendegenin aıtyp otyr. Mysaly, qan aınalymy júıesi aýrýlarynan, qaterli isikterden, týberkýlezden, jazataıym oqıǵalardan, ýlanýdan jáne jaraqattanýdan bolatyn ólim-jitim azaıdy.
Bıyl «Aýyldyń densaýlyq saqtaý salasyn jańǵyrtý» ulttyq jobasy aıasynda oblys ortalyǵynan shalǵaı jatqan eldi mekenderde 25 medısınalyq mekeme salý josparlanyp otyr.
Qostanaı oblysy
