Saltanatty is-sharaǵa Túrkistan oblysy ákiminiń orynbasary Beısen Tájibaev, Qorǵanys isteri jónindegi departamenti men basqarmasynyń basshylyǵy, QR Qarýly Kúshteriniń ardagerleri, basqa memleketter aýmaǵyndaǵy áskerı qımyldar ardagerleri, «Analardyń júregi «sarbaz analar komıteti» RQB ókili Sharıfa Mýmınova, «Jas sarbaz» áskerı-patrıottyq qozǵalysynyń tárbıelenýshileri, sondaı-aq áskerge shaqyrylýshylardyń týystary men jaqyndary qatysty.
Oblys ákiminiń orynbasary Beısen Tájibaev áskerge shaqyrylýshylar men qonaqtarǵa arnaǵan sózinde óńirde turatynyn 2,2 mıllıonnan astam adamnyń 630 myńǵa jýyǵy jastar ekenin atap ótti.
«Búgin biz oblysymyzdan áskerge shaqyrylýshylardyń eki komandasyn attandyryp jatyrmyz. Osy sátte Baýyrjan Momyshulynyń «Eshkim ishten batyr bolyp týmaıdy: batyrlyq ta, minez sekildi ósken orta, kórgen tárbıege baılanysty qalyptasady» degen sózderin eske alǵym keldi. Búgin áskerge attanǵan jigitter áskerı salanyń qyr-syryn meńgerip, aıtýly azamattarǵa aınalady dep senemin. Bul ońaı sala emes, úlken jaýapkershilikti talap etedi. Bizdiń jigitter mindetti abyroımen atqarady degen oıdamyn. Barshańyzǵa sátti sapar, densaýlyq tileımin», dedi Beısenbaı Tájibaev.
Qorǵanys isteri departamentiniń bastyǵy polkovnık Nurmahanbet Dúısebaev áskerge shaqyrylýshylardy osynaý jaýapty jáne mańyzdy kezeńmen quttyqtap, bul tájirıbe olarǵa mindetti túrde paıdaly bolatynyn atap ótti.
«Qyzmet barysynda denelerińiz shynyǵyp qana qoımaı, sondaı-aq jaýapkershilik pen tártipke negizdelgen naǵyz azamattyń úlgisine aınalasyzdar. Barlyǵyna sáttilik pen amandyq tileımin», dedi Nurmahanbet Dúısebaev.
Kóktemgi áskerge shaqyrý naýqany kezinde oblystan 2500-ge jýyq adamdy shaqyrý josparlanǵan. Búgingi tańda Shekara qyzmetine 320-dan astam er-jigit jiberildi, naýryz aıynyń sońynan bastap QR Qarýly kúshteriniń áskerı bólimderine shaqyrý bastaldy. Is-shara sońynda Túrkistan qalasynyń Mádenıet úıiniń ókilderi konserttik baǵdarlama uıymdastyrdy.
