Jergilikti atqarýshy organ ókilderi Shyǵys Qazaqstannyń aýdandarynda aldyn alý is-sharalary jumystaryn kúsheıtti. Jalpy uzyndyǵy 365,8 km 427 aryq, 133,4 km 71 sý kanaly, avtomobıl joldarynda 3 552 jáne temirjol joldarynda 90 sý ótkizý qurylysy, sondaı-aq 447 kópirdiń asty qardan tazartyldy. Kólemi 365 myń tekshe metrden asa qar shyǵaryldy.
Dese de, Tarbaǵataı aýdanynda erigen qar sýy jol ústine shyǵyp ketip, kólikterdiń qatynaýyna qıyndyq týǵyzyp jatyr. Dálirek aıtsaq, Qalbataý – Maıqapshaǵaı respýblıkalyq tasjolynyń 1 113-shaqyrymynda qarǵyn sý jolǵa jaıylǵan. Eni 300 m-di bassa, tereńdigi 5-10 sm. «Qazavtojol» qyzmetkerleriniń aıtýynsha, bul ýchaskede bir ǵana sý ótkizgish qubyr bar. Qazirgi ýaqytta joldy jaýyp, sýdy bógeý jumystary júrgizilip jatyr. Bul úshin 10 shaqty jumysshy, 8 birlik arnaıy tehnıka qaýiptiń betin qaıtaryp júr.
Kóbinese ózen arnalarynda muz keptelip, sý kóterilip ketip, mańaıyndaǵy aýyldarǵa jaıylady. Sol úshin de óńirdegi ózenderde 201 796 sharshy metr aýmaqta muz jarý jumystary júrgizildi. Muzy talqandalyp, arnasy ashylǵan ózenderdiń sýy kóktemde kóterilgenimen, keńirdeginen shyǵyp, tasymaýǵa tıis. Al Kúrshim aýdanynyń Topterek aýlyna jete beristegi kópirdi tosynnan kelgen tasqyn sý buzyp ketip, aýyl turǵyndarymen jol baılanysy úzilip qalǵan. Jergilikti turǵyndardyń aıtýynsha, bul kópirdi eki jylda bir sý shaıyp ketetin kórinedi. Aýdan basshylyǵy bul máseleni sheshý úshin jańa ári berik kópir salý kerektigin aıtty.
«Mundaı úsh kópir bar. Kún kúrt jylyp, qarǵyn sý bir kópirdi búldirip ketti. Sý aǵyzyp ketken kópir 2020 jyly jóndelgen. Endi aýyl adamdaryn qaıyqpen tasymaldaımyz. Keıin sý azaıǵan soń, aınalma jol jasaımyz. Qalaı degenmen kópirlerdi jańartýymyz kerek», deıdi Kúrshim aýdanynyń ákimi Almat Aqyshev.
ShQO TJD qyzmetkerleri halyqty sý tasqyny kezeńine daıyndaý maqsatynda 149 eldi mekende 270-ten asa reıd júrgizdi. Nátıjesinde, 20 myńnan asa halyqqa túsindirý jumysy júrgizildi. Alda-jalda qarǵyn sý úı-jaılarǵa jaıylyp ketse, turǵyndardy evakýasııalaý jospary da pysyqtalǵan. Mamandardyń aıtýynsha, jalpy syıymdylyǵy 17 myń adamnan asatyn 153 azamatty ýaqytsha ornalastyrý pýnktteri belgilenip qoıdy.
Qaýip bar-aý degen aýdandarǵa qosymsha kúshter de jumyldyryldy. Máselen, sý tasqynyna qarsy jumystarǵa Semeı qalasynan arnaıy kelgen TJM №68303 áskerı bóliminiń qyzmetkerleri qarǵyn sýdyń aldyn alý úshin Altaı aýdanynda jumystar júrgizip júr. Usaq ózenderdi aıtpaǵanda, Altaı aýdanyn tilip aǵyp jatqan Buqtyrma, Turǵysyn ózenderi bar. Onyń ústine qar qalyń túsken óńir. Sol úshin de qosymsha kúsh salynyp otyr. Altaı aýdany ǵana emes, ózen-kólder boıyndaǵy aýdandardyń barlyǵynda jumys kúsheıtilgen.
Shyǵys Qazaqstan oblysy
