Qaýyljyr ózeni Shalqar kólin toltyryp, temirjol boıyndaǵy Ulpan, 67-razezdegi úılerge kirdi. Temir aýdanynyń Shubarqudyq, Sarkól, Shubarshı, Eńbek, Qumsaı aýyldaryna, Muǵaljar aýdanynyń Embi, Birlik, Jaǵabulaq aýyldaryna sý kirip, tasjoldardy shaıyp, kópirlerdi buzdy, elektr baǵanalaryn qulatty. Qobda aýylyna, Oıyldyń tórt aýylyna kirdi. TJD men polısııanyń qutqarý jasaqtary turǵyndardy Oıyl aýdanynyń ortalyǵyndaǵy mektep pen kolledj ǵımaratyna evakýasııalady. Oıyl aýdanynyń Ekpetaly men Qaratal aýyldary sý astynda qaldy. Úı-jaıy men malyn tastap kete almaǵan kópshilik adam boıymen birdeı kóterilgen sýdan qashyp, bir tún mekteptiń shatyryna shyǵyp, kómek kútti. T.Bıgeldınov atyndaǵy áskerı áýe kúshteri ınstıtýtynyń ushqyshtary Qaratal aýylynyń – 27, Kógaly aýylynyń 68 turǵynyn evakýasııalady. Oıylmen arada kólik baılanysy úzildi. Yrǵyz ózeniniń sýy Qarabutaq, Qarasaı aýyldarynyń úılerine kirdi. Áıteke bı aýdanynda byltyr salynǵan Sherbakov bógetin tasqyn buzyp, Temirbek Júrgenov aýylyna sý kirdi. Yrǵyz aýdany Qurylys aýyly mańynda, Samara-Shymkent tasjolynyń boıyndaǵy kópirdi aǵyzyp ketti. Úlken Sazdy ózenimen jalǵasqan kishi Sazdynyń úıdeı-úıdeı seńderi Aqtóbe qalasynyń ortasyna deıin baryp, ázer toqtady. Or ózeni Hromtaý aýdanyndaǵy Qopa jáne Tamdy aýyldarynyń arasyndaǵy joldy talqandady.
28 naýryzda Aqtóbe qalasy men Qobda, Muǵaljar, Temir aýdandarynda tótenshe jaǵdaı jarııalandy. Sol kúni alty aýdanda elektr jaryǵy sónip, 200-ge jýyq úı sý astynda qaldy, 2 870 adam evakýasııalandy. Elek ózeninen Aqtóbe qoımasyna bir táýlikte 150 mln tekshe metr sý quıylyp, plotınanyń jarylý qaýpi tóngen soń sekýndyna 1 myń tekshe metrden sý jiberile bastady. Jaıylǵan sý Elek ózeni jaǵalaýy men Qarǵaly ózeniniń Kirpishti kópirine jaqyn jerdegi turǵyn úı alaptaryna jetti. Qutqarýshylar men polısııa jasaǵy osy jerdiń turǵyndaryn shuǵyl túrde evakýasııalady. Oblys ortalyǵyndaǵy 53 mektep ýaqytsha evakýasııalaý ortalyǵyna aınaldy. Aqtóbege Premer-mınıstrdiń birinshi orynbasary Roman Sklıar kelip, jaǵdaıdy óz kózimen kórdi. Qazir Aqtóbe qalasynda – 32, Oıyl aýdanynda – 17, Temir aýdanynda – 5, Qobda aýdanynda – 6, Hromtaý aýdanynda – 1, Yrǵyz aýdanynda 1 mektepti 3 108 adam panalap júr, olardyń 1 518-i – balalar. Osy mektepterdiń oqýshylary 5 sáýirge deıin qashyqtan oqıdy.
Kútpegen jerden tasqyn sýdyń astynda qalǵan aqtóbelikter uıymshyldyqpen áreket etti. Oblys ákimi Ashat Shaharov pen qala ákimi Azamat Beket sý tasyǵan mezetten bastap, turǵyndardyń janynan tabyldy. Jergilikti atqarýshy organdar, tótenshe jaǵdaı, polısııa qyzmetkerleri, volonterler, depýtattar, qarapaıym turǵyndar, kásipkerler zardap shekkenderge kómek qolyn sozdy. Qara sýdy belden keship, saıajaıda qalyp qoıǵan adamdardy, jan-janýardy alyp shyqqan qutqarýshylardyń eńbegi zor. Bul kúnderi sý basqan jerlerden turǵyndardy kóshirýge 1,5 myń adam, 320-dan asa tehnıka men 70 motopompa jumyldyryldy. Kóńilge medeý bolatyny – adamdar aman. О́kinishtisi, kóptegen úı turýǵa jaramsyz bolyp qaldy, mal shyǵyny kóp, joldar, elektr baǵanalary, gaz jelileri buzyldy.
Aqtóbe oblysy
