Foto: gov.kz
Ǵylym jáne joǵary bilim mınıstrliginiń habarlaýynsha, qujattardy qabyldaýdyń sońǵy kúni: 2024 jyldyń 12 mamyry (24.00-ge deıin). «Abaı-Vern» stıpendııalyq baǵdarlamasy – Qazaqstan Respýblıkasy Ǵylym jáne joǵary bilim mınıstrligi men Fransýz Respýblıkasynyń Eýropa jáne syrtqy ister mınıstrligi arasyndaǵy birlesken jobasy. Bul baǵdarlama sheńberinde mamandyq tańdaýǵa shekteýsiz qazaqstandyq joǵary oqý oryndarynda oqıtyn ekinshi oqý jylyndaǵy magıstranttar úshin 45 stıpendııa jáne dıssertasııalyq jumysyn birlesken ǵylymı jetekshilik negizinde júzege asyrýdy kózdegen doktoranttar úshin 5 stıpendııa usynylady.
Mınıstrlik jarııalaǵan habarlandyrýda: «Magıstratýraǵa shákirtaqy alýǵa konkýrsqa jas shamasyna shekteý joq, Qazaqstan Respýblıkasynyń azamaty, 2024-2025 oqý jylyna qazaqstandyq joǵary oqý orny magıstratýrasynyń 2-kýrsynda oqıtyn, Fransııanyń ýnıversıtetine Master 1 nemese Master 2 baǵdarlamasy boıynsha qabyldanǵany jóninde shaqyrý nemese rastaý haty bar úmitkerler qatysa alady. Sonyń ishinde qos dıplom baǵdarlamalary boıynsha bilim alýshylarǵa basymdyq beriledi. Al doktorantýraǵa shákirtaqy alýǵa konkýrsqa qatysý úshin: Qazaqstan Respýblıkasynyń azamattyǵynyń bolýy; jas shamasy shekteýsiz; 2024-2025 oqý jylyna dıssertasııany birlesken ǵylymı jetekshilikpen daıarlaýdy kózdeıtin qazaqstandyq ýnıversıteti doktorantýrasynyń 1-kýrsyna tirkelý; Fransııanyń joǵary oqý ornyna doktorantýranyń 1-kýrsyna qabyldanǵany jóninde shaqyrý nemese rastaý hattyń bolýy talap etiledi», delingen.
Baǵdarlama boıynsha stıpendııa utyp alǵan magıstranttarǵa aıyna 10 aı ishinde (qyrkúıekten maýsymǵa deıin) 800 eýro, doktoranttarǵa 3 jyl ishinde jylyna 6 aı merzimge aıyna 1500 eýro kóleminde shákirtaqy (joǵary oqý orny buıryq shyǵarǵan kezdegi Qazaqstan Respýblıkasy Ulttyq bankiniń kýrsyna saı) tólenedi. Al Fransýz úkimetiniń áleýmettik qamtý boıynsha shákirtaqysy (BCS) mynadaı múmkindikter beredi:
– Fransııaǵa tegin uzaqmerzimdi stýdenttik vıza (negizinde stıpendııa almaıtyn stýdentterge vıza 99 eýro turady);
– Fransııadaǵy memlekettik oqý oryndarynyń kópshiliginde mindetti tirkeý jarnasyn (sheteldik stýdentter magıstratýrada oqý úshin tirkeý jarnasyna jylyna 3 770 eýro, doktorantýrada oqý úshin jylyna 380 eýro tóleýge tıis) tóleýden bosatylady;
– CROUS jataqhanalarynan oryn ala alady (CROUS memlekettik ýnıversıtet jataqhanasynyń jaldaý aqysy aıyna 300-den 600 eýroǵa deıin, al jekemenshik sektorynda aıyna 800-den 1000 eýroǵa deıingi somany quraıdy);
– Stýdenttik ashanalarda jeńildikpen (keshendi túski as-1 eýro) tamaqtanady;
– Tegin qosymsha medısınalyq saqtandyrý (shákirtaqy almaıtyndar úshin 300 eýro) aqysy tólenedi;
– Campus France agenttigi tarapynan aqparattyq qoldaý kórsetiledi.
Biraq stıpendıat myna máseleni túsinýi kerek, kólik shyǵyndaryn stýdentter óz qaltasynan tóleıdi. Osyǵan qosa stýdent barlyq sabaqqa qatysýǵa mindetti, olaı bolmaǵan jaǵdaıda shákirtaqyny tóleý toqtatylady. Oqý jyly barysynda stýdenttiń bastamasymen oqý toqtatylǵan jaǵdaıda (tótenshe jaǵdaılardy qospaǵanda), stýdent buryn aýdarylǵan qarajatty tolyq kólemde qaıtarýǵa tıis.
Úmitkerdiń qujattamasyna qatysty talaptarǵa kelsek, Fransýz joǵary oqý oryndaryna nemese ǵylymı-zertteý ortalyǵyna magıstratýra nemese doktorantýra baǵdarlamalary boıynsha oqýǵa aldyn ala qabyldanǵany jóninde shaqyrý-haty bolý kerek. Qabyldaý rásimi aıaqtalmaǵan jaǵdaıda, ótinishtiń kóshirmesin tirkeý qajet. Odan keıin tańdalǵan baǵdarlamaǵa baılanysty fransýz nemese aǵylshyn tilinde, sondaı-aq qazaq nemese orys tilinde túıindeme jáne týra osyndaı tilderge qatysty tártippen ýájdemelik hat (bir paraq, tek aldyńǵy jaǵy) talap etiledi. Pasporttyń birinshi betiniń, bakalavrıattan bastap dıplomdar men baǵalary bar qosymshalardyń kýálandyrylǵan kóshirmesi kerek. Fransýz tilinde oqý baǵdarlamasyn tańdaǵan úmitkerler B1 (DELF, DALF, TCF) deńgeıinen tómen emes fransýz tilin meńgergeni týraly dıplom ótkizýge tıis. Biraq bul talap joǵary oqý oryndarda fransýz tilinde bilim alǵan úmitkerlerge qoldanylmaıdy. Sol sekildi aǵylshyn tilinde oqý baǵdarlamasyn tańdaǵan úmitkerler V2 (TOEIS, TOEFL, IELTS) deńgeıinen tómen emes aǵylshyn tilin meńgergeni týraly dıplom tapsyrýǵa mindetti. Biraq munda da joǵary oqý oryndarda aǵylshyn tilinde bilim alǵan úmitkerlerden talap etilmeıdi. Doktorantýraǵa oqýǵa úmitkerler qosymsha mynadaı qujattardy tapsyrady: 1.ǵylymı jetekshiniń pikirimen qosa ǵylymı zertteý jobasynyń qysqasha sıpattamasy (dıssertasııanyń tiline baılanysty fransýz nemese aǵylshyn tilinde – eki bet), sondaı-aq qazaq nemese orys tilinde; 2.shyǵarylǵan ǵylymı eńbekteri men jarııalanymdarynyń tizbesi (aǵylshyn nemese fransýz tilinde), sondaı-aq qazaq nemese orys tilinde; 3.Ǵylymı jetekshileri tarapynan aǵylshyn nemese fransýz tilinde usynys hat (erkin nysanda), sondaı-aq qazaq nemese orys tilinde.
Úmitker óziniń qujattamasyn 10 Mb aspaıtyn PDF formatynda verne@gmail.com elektrondyq mekenjaıǵa jiberý qajet. Barlyq qujattama magıstratýra baǵdarlamalary úshin «2024Master_TEGI_ESIMI» degen ataýmen, doktorantýra baǵdarlamalary úshin «2024PhD_TEGI_ESIMI» degen ataýmen jáne tegi men esimi tólqujattaǵydaı latyn áripterimen jazylyp joldanýy kerek. Durys resimdelmegen qujattamalar qarastyrylmaıdy. Qujattama qabyldanǵannan keıin úmitkerge rastaý-hat jiberiledi. Irikteýdi táýelsiz Qazaqstan-fransýz aralas komıssııasy júzege asyrady. Konkýrstyń nátıjeleri 2024 jylǵy maýsym aıynyń basynda Fransııanyń Qazaqstandaǵy Elshiliginiń https://kz.ambafrance.org/saıtynda jarııalanady. «Abaı-Vern» baǵdarlamasyna qatysty qosymsha aqparatty Fransýz Alıanstary janynda ornalasqan Campus France agenttikteri tarapynan alýǵa bolady.
