Qazir kóp úılerdiń aýlalarynda áli de qar úıindileri, muzdaqtar jatyr. Jylymyq jańbyr sonyń bárin jyldam eritedi, al topyraqtyń boıynda ylǵaldyń kóp bolýynan sý jerge sińe almaıdy. Sondyqtan jertólelerge sý tolyp, úılerge sý kirýi múmkin. Osyǵan baılanysty Tótenshe jaǵdaılar departamenti turǵyndardan aýlalaryn qar men muzdaqtardan jedel tazartýdy talap etip jatyr. Aýlanyń ishindegi, syrtyndaǵy sýaǵarlardy, aryqtardy tazartyp, sýdyń jolyn ashý kerek. Qyzyljar qalasynyń yldıdaǵy aýdandaryndaǵy jekemenshik úılerge álden sý kirip jatyr. Qalalyq ákimdik pen TJ qyzmetkerleriniń tehnıkalary shaqyrǵan úılerdiń bárine baryp, qarǵyn sýdy pompalarmen dalaǵa aıdap jatyr. Qalanyń 109 ben 112 qutqarý qyzmeti nómirlerinde osy kúnderi tynym joq.
Oblystyń ońtústik aımaqtarynda da bul kúnderi tynysh emes. Taıynsha aýdanynyń aýmaǵynan ótetin Shaǵalaly ózeniniń sýy kóterilip, Taıynsha qalasynyń shetkergi aýdandaryna qaýip tóndirip tur. Eń shetki «Kúnshyǵys» kóshesiniń shamamen 60 tútin bolatyn turǵyndary men maldaryn qalanyń ortasyna evakýasııalaý sharalary uıymdastyrylyp, №5 mektep pen agrobıznes kolledjiniń jataqhanalary bosatylyp jatyr. Turǵyndardy tasýǵa 4 tehnıka sapta tur, al maldardy ortalyqqa qaraı aıdaý úshin jastar atqa qonǵan.
Jalpy, Shaǵalaly ózeniniń osy mańdaǵy 6 shaqyrymdyq jaǵalaýyna ınertti materıaldardan bıiktigi bir metr sý bógen turǵyzylǵan. Qosymsha 600 qap ınertti materıaldar daıyn tur.
Oblys ákimi Ǵaýez Nurmuhambetov tikushaqpen Ǵ.Músirepov, Shal aqyn, Aıyrtaý jáne Tımırıazev aýdandarynyń qaýipti aımaqtaryn aralap shyqty. Bul aımaqtarda qardyń erýi áli kúrt emes, tek kún qyzdyrǵan aımaqtardyń juqa qarlary ǵana ketip jatyr. Alaıda ózenderdiń qaýpi zor.
«Bul aýdandarda shaǵyn ózenderdegi seńniń tiresip, turyp qalýynan sý tasýy múmkin. Ásirese Aqjar, Taıynsha jáne Ýálıhanov aýdandaryndaǵy qaýip zor. Astana men Aqmola sý qoımalarynan bul aımaqtarǵa tasqyn sý keledi. Qazir bul aýdandarda barlyq qutqarý kúshteri sapqa qoıyldy. Tehnıkalar daıyn. Aǵysty tejemeý úshin ózenderdegi qalyń muzdar jaryldy. Evakýasııalyq beketter iske qosyldy. Inertti materıaldar toltyrylǵan qaptar men JJM jáne júzetin quraldardy daıyndap qoıdyq. Barlyq jaǵdaıdy jeke ózimniń baqylaýyma aldym», dep oblys ákimi Telegram-daǵy paraqshasynda jazdy.
Daıyndyq qansha jaqsy bolǵanymen avtojoldardyń ústine sý shyǵyp ketken aımaqtar bar. Bul jaǵdaı, ásirese, Ýálıhanov aýdanynda kóbirek bolyp tur. Taıynsha aýdanynda da respýblıkalyq joldardyń eki jerinen sý ótip ketti. «Kókshetaý-Omby» respýblıkalyq trassasynyń 85-213 shaqyrym aralyǵy sý júrip ketkendikten jabyldy. Ýálıhanov jáne Aqjar aýdandarynda da eki oblystyq mańyzdaǵy joldar sý qaýpinen ýaqytsha jabyldy.
TJD baspasózben baılanys qyzmetiniń ókili Evgenıı Jýravlevtiń aıtýyna qaraǵanda, qarǵyn sýǵa qarsy sharalar kúndiz-túni júrgizilip jatyr. Búginge deıin barlyq eldi mekenderden 1,9 mln tekshe metr qar dalaǵa tasyldy. 2 460 sýaǵar qubyrlary men 242 aryqtar tazalanǵan. Sý sińý úshin 1 064 gektar jerdiń qary syrylyp, jer qaraıtylǵan. Jyl basynan beri ınertti materıaldar toltyrylǵan 28 myń qap daıyndalǵan. Bul jumystar Ǵ.Músirepov aýdanyndaǵy Novoıshım, Rýzaev, Chıstopol, Birlik, Tahtabrod aýyldarynda jiti júrgizilgen, óıtkeni bul jaqtarda sý basý qaýpi zor.
Aqjar aýdanyndaǵy Qarasý ózeniniń Qýlykól aýylynyń túbinde keptelis bolmas úshin muzdar arnaýly jarylǵysh zattarmen jarylǵan. Jarylǵan muzdyń jalpy kólemi – 800 sharshy metr. Buǵan 100 kg jarylǵysh zattar paıdalanylǵan. Osyndaı jumystar Sharyq, Aqan Burlyq jáne Esil ózenderinde de júrgizilgen edi. Sonymen qatar búginge deıin eldi mekenderdiń aýlalarynan 25 myń tekshe metr sý aıdalǵan.
Soltústik Qazaqstan oblysy
