Robottehnıka rekordy

Sıngapýrde ótken «First Lego League Challenge» robottehnıkadan halyqaralyq chempıonat máresine jetti. Halyqara­lyq jarysqa Ońtústik Koreıa, Malaızııa, Polsha, Indonezııa jáne Qytaıdan 100-den asa oqýshy qatysty. Osy atalǵan dodada otandyq oqýshylar álemniń jas ınjenerlerimen básekege tústi. Úsh kúnge sozylǵan jarys qorytyndysy boıynsha elimizdiń órenderi eń joǵary marapatqa ıe bolyp, rekord jasady.

Elimizdiń namysyn «Ro alemi» komandasynyń quramynda Se­meı qalasynyń Bilim-ınnovasııa ­já­ne №22 orta mektebiniń oqý­shy­lary Arystan Ibragım, Jana­rys Ardahov, Darhan Mamadı­lov, Aıdmuhamed Tabarakov, Ádiljan Qabykenov, Azat Sa­pa­raly, Jáni­bek Ábdikárimov qorǵady. Olar chempıonatta yqtımal 550 upaıdan 540 upaı jınap, rekord ornatyp, «Robot Design» atalymyn jeńip aldy. Sonymen qatar barlyq tórt baǵyt boıynsha joǵary nátıje kórsetkeni úshin «Champions Award» bas atalymynda bas júl­deni qanjyǵasyna baılady. Sondaı-aq otandyq «Tamos Éducation» mektebiniń «QSTEM-TAMOS Stars» komandasynyń quramynda óner kórsetken Ma­dııar Namazaly, Nuráli Saty­baldy, Rashıd Ahmedjanov, Ań­sar Baıazerov chempıonattyń bar­lyq tórt baǵyty boıynsha joǵary kórsetkishke qol jetkizip, «Champions Award» atalymynda I oryndy jeńip aldy. Atyraý qalasynyń Bilim-ınnovasııa lıseıiniń oqýshylary «Pioneers» komandasynyń quramynda Málik Islam, Nurıslam Berikuly, Bekasyl Nurymjan, Erasyl Nurymjan, Almaz Abzal, Almas Erlanuly, Aldııar Shamar, Áli­sher Danılov óner kórsetti. Olar ınnovasııalyq jobany tabysty júzege asyrǵany úshin «Innovation Project» atalymynyń fınalısteri atandy.

«Robottar oınynda tap­qyrlyq tanytyp qana qoımaı, komanda­nyń uıymshyldyǵyn, ne­gizgi qundylyqtaryn kórsetý kerek boldy. Biz ınnovasııalyq jobamyzdy kórsettik, tanys­tyrdyq. Bul jarystan keremet tájirıbe aldyq, elimizdiń biz­ge úmit artyp otyrǵanyn bil­gen­dikten, jeńiske bar kúsh-jige­ri­mizdi saldyq. Nátıjesinde, álem­niń ozyq el­deriniń arasynan sýy­rylyp shy­ǵyp, rekord ornat­tyq», deıdi qýa­ny­shyn bólisken oqýshylar.  Eske sala keteıik, oqýshylar halyq­aralyq chempıonatqa jol­da­many Oqý-aǵartý mınıstr­ligi­niń qoldaýymen «Daryn» res­pýblıkalyq ǵylymı-prak­­tıkalyq ortalyǵy jáne «USTEM Foundation» qoǵamdyq qory uıymdastyrǵan «FIRST Central Asia» Ortalyq Azııa oıyndarynda jeńip alǵan edi.