Júsipbek Aımaýytuly kolledji

Mazmundy is-sharaǵa ýnıver­sıtettiń basqarma tóraǵasy-rektor mindetin ýaqytsha atqa­rýshy Gúljan Súgirbaeva, Shym­kent qalasy ákiminiń orynbasary Sársen Quranbek, qalalyq bilim basqarmasynyń basshysy Nurgúl Shámshıeva, zııaly qaýym ókilderi qatysty.

Is-shara barysynda qonaqtar kolledjdiń saltanatty ashylý lentasyn qıyp, júrekjardy lebizin bildirdi. Alǵashqy sóz kezegi tıgen rektor mindetin ýaqyt­sha atqarýshy G.Súgirbaeva jınal­ǵan qaýymdy qaıta túrlen­gen jańa oqý ǵımaratymen qut­tyqtap, Alash qaıratkeri atyn­daǵy kolledj stýdentterin sol atqa saı laıyqty bilim alýǵa shaqyrdy.

«Kolledjdi J.Aımaýyt­uly­nyń atymen ataýymyzdyń rámizdik máni bar. О́ıtkeni Alash arysynyń ómiriniń sońǵy sátteri Shymkentte ótken. Sondyqtan burynǵy tehnıkým bolǵan qazirgi pedagogıkalyq ýnıversıtetpen qaıratker taǵdyry tyǵyz baılanysty. Qazaq pedagogıkasynyń bastaý bulaǵynda turǵan tulǵaǵa byltyr oqý ordasynda memorıaldy taqta ornattyq. Al kolledjdi ashýdaǵy basty maqsatymyz – urpaq sabaqtastyǵyn jalǵap, ozyq oıly, básekege qabiletti bilikti mamandar daıarlaý bolyp otyr», dedi ol.

Qala ákiminiń orynbasary S.Quranbek kolledjdiń bilim berýdegi baǵyt-baǵdaryna toq­talyp, Alash ıdeıasynyń tarıhı mazmuny týraly oı tolǵady.

Quttyqtaý leginen keıin qo­naqtar J.Aımaýytulyna arnap ashylǵan bıýstke gúl shoǵyn qoıdy. Ýnıversıtettiń ónerpaz jastary kórnekti qalamgerdiń «Alash urany», «Alash marshy» atty ánderin oryndady. Sodan keıin jınalǵandar oqý ǵımaratynyń oqý-óndiristik sheberhanasymen, sport alańymen tanysty.

Kolledjde bastapqy kezde pedagogıka salasynyń úsh baǵyty boıynsha mamandar oqy­tylady. Olar: «Bastaýysh bilim berý pedagogıkasy men ádistemesi», «Mýzykalyq bilim berý», «Kórkem eńbek». Ustaz­dar­­dyń aıtýynsha bul kolledj túlekteriniń ýnıversıtetke daıyn stýdent bolyp kelýine septigin tıgizedi. Sonymen birge joǵary oqý ornyna túsý talabyn jeńildetip, qysqa merzim ishinde dıplom alyp, muǵalim atanýyna múmkindik beredi. Keleshekte bul kolledjde J.Aımaýytuly murasyn jalǵastyrýshy pedagog mamandar daıarlanady. Al arnaýly oqý ornynyń ashylýymen Shymkenttegi kásiptik bilim berýshi mekemeler qatary taǵy da kóbeıe tústi.

ShYMKENT