Foto: Tobolinfo
Petropavl qalasynyń ákimi Serik Muhamedıev oblystaǵy sý tasqyny saldaryna baılanysty jaǵdaıdyń áli de kúrdeli ekenin aıtty. Sergeev sý qoımasynyń tasýy 415 sm quraıdy, bul kórsetkish 2017 jylǵy deńgeıden asyp tústi. Qalanyń Zarechnyı, Kojevennyı, Teplıchnoe, Podgora aýdandarynda 2000-nan astam adam men 29 saıajaı eldi mekenderin sý basý qaýpi joǵary.
«Atalǵan mańaılardyń turǵyndary baǵaly zattar men janýarlardy tasymaldaýy kerek. Muqtaj jandarǵa kómek kórsetiledi. Qurmetti qala turǵyndary, sizderdiń múlikterińizdi tasymaldaýǵa eshkim kedergi keltirmeıdi. Ýaqyt joq, sýdyń kelýin kútpeýimiz kerek. Barlyq sharalardy qazir qabyldańyzdar», dedi qala ákimi.
Ákim qalalyq sý arnasyna qaýip tónip turǵanyn aıtyp, jergilikti turǵyndardy kómekke shaqyrdy.
«Adamdar men tehnıka táýlik boıy jumys istep jatyr. Sondyqtan sizderdiń kómekterińiz qajet. Zarechnyı, Kojevennyı, Ýsheva aýyldaryndaǵy bógetterdi nyǵaıtý jumystaryna erikti azamattardy shaqyrǵym keledi. Sondaı-aq Podgora oblysynyń qamqor turǵyndaryna alǵysymdy bildiremin. Olar kesheden beri aınalma joldaǵy qorshaýdy nyǵaıtyp jatyr. Qurmetti turǵyndar, sabyr saqtańyzdar. Sarapshylardyń usynystaryn oryndańyzdar. Birde-bir turǵyn men onyń múlki nazardan tys qalmaıdy», dedi S.Muhamedıev.
Qyrmyzy JUMAǴALIQYZY,
EUÝ stýdenti
