«Máselen, Qaratomar sý qoımasynda sý jiberý tarıhyndaǵy eń joǵarǵy mólsher tirkeldi. Qazir atalǵan sý qoımasynan jiberilip jatqan sý mólsheri 660 m3/s-qa azaıyp, sekýndyna 2 640 tekshe metrdi qurady. Joǵarǵy Tobyl jáne Jelqýar sý qoımalarynda da jiberilip jatqan sýdyń mólsheri azaıyp jatyr. О́zenderdegi sý deńgeıi tómendep keledi. Tobyl ózeniniń Joǵarǵy Tobyl sý qoımasynyń joǵary jaǵyna ornalasqan gıdrologııalyq bekettegi sýdyń táýlik ishinde 56 sm-ge tómendeýi tirkeldi. Áıet ózeniniń 63 sm-getómendegeni baıqaldy. Jalpy, oblys boıynsha jaǵdaı birtindep turaqtalyp keledi. Qarasý aýdanyndaǵy Tintýir, Qundyzdy jáne Qarasý ózenderinde sý deńgeıiniń tómendeýi táýligine 17-den 127 sm-ge deıin boldy. Oblystyń ońtústik aýdandaryndaǵy Torǵaı, Dámdi jáne Qabyrǵa ózenderinde áli de joǵary deńgeı saqtalyp otyr. Qalǵan ózenderde negizinen sý deńgeıi tómendedi», dedi Qumar Aqsaqalov.
Oblys ákimi sý tasqynynan zardap shekkenderge kómek kórsetý jumystary bastalǵanyn aıtty. Turǵyndarǵa birjolǵy áleýmettik tólemder beriledi, sondaı-aq demeýshilik jáne gýmanıtarlyq kómek kórsetiledi. Búginge deıin 587 otbasyǵa 107,3 mln teńge tólengen.
Oblysta qazirshe 28 eldi meken jaryqsyz otyr. Qatty tasqynnyń saldarynan baǵandar qulap, isten shyqty. Bul olardy qalpyna keltirý jumystaryn qıyndatyp otyr, sý ketkennen keıin jumys jalǵasady. Sý tasqyny kezinde 24 avtojolda qozǵalys shekteldi, qazir 9 joldaǵy qozǵalys qalpyna keltirildi. Qalǵan jumystar jalǵasyp jatyr. Keltirilgen shyǵyndy baǵalaý boıynsha jumys júrip jatyr. Barlyq shyǵyn tolyq óteledi.
«Men osy qıyn-qystaý kezeńde bir jaǵadan bas, bir jeńnen qol shyǵaryp, eldik pen birliktiń úlgisin kórsete bilgen jerlesterime rızashylyǵymdy bildirgim keledi. Tótennen kelgen apat oblystyń barlyq turǵyndaryn biriktirdi. Birlik biz úshin bárinen qymbat! Qazaqstan halqynyń salt-dástúrinde, muqtaj jandarǵa kómektesý, qol ushyn berý árqashan urpaqtan-urpaqqa jalǵasyp otyrady. Alǵashqy kúnnen bastap memlekettik qyzmetshilerge, bıýdjet qyzmetkerlerine qutqarýshylarǵa, quqyq qorǵaý organdarynyń qyzmetkerlerine osy jaǵdaıǵa beı-jaı qaramaıtyn azamattar, eriktiler, Qazaqstan halqy Assambleıasynyń músheleri, jeke uıymdardyń qyzmetkerleri qosyldy. Men ózim turǵyndardyń ıgi isteri men aq jarqyn kóńilderine kýá boldym. Sizder oblys pen el úshin qıyn kúnderde, syn saǵattarda bir-birińizge qoldaý kórsetip, kómekke keldińizder. О́z jumystaryńyzdy tastap, kóppen birge boldyńyzdar. Zardap shekkenderge azyq-túlik tasyp, túni boıy eldiń amandyǵyn oıladyńyzdar. Biz bir sátte birigip, tabıǵı apattyń aldyn aldyq. Eger osy birligimiz bolmaǵanda, apattyń saldaryóte aýyr bolar edi. Qymbatty jerlester! Apat aıtyp kelmeıdi. Biraq Qostanaı jurty naǵyz yntymaq pen tatýlyqtyń jarqyn úlgisin kórsete bildi. Biz birge bolsaq, alynbaıtyn qamal joq. Árqaısyńyzǵa erekshe alǵys bildiremin!», dedi aımaq basshysy.
Qostanaı oblysy
