Baıqaǵanymyz, Prezıdentpen kezdesýden keıin aýyl turǵyndarynyń kóńilindegi alań seıilip, qýanyshty kúıde júr eken. «Hal-jaǵdaılaryńyzdy bilý úshin arnaıy kelip otyrmyn. Bul – buryn-sońdy bolmaǵan úlken tabıǵı apat. Sondyqtan bárimiz bir el, bir halyq bolyp áreket etýimiz kerek. Memleket, Úkimet barshańyzǵa qolushyn beredi. Materıaldyq, qarjylyq kómek kórsetedi. Oǵan esh alańdamańyzdar. Bári durys bolady», degen edi Memleket basshysy.
– Qadirli aǵaıyn, el basyna týǵan osynaý qıyn kúnderi búkil halqymyz bir jaǵadan bas, bir jeńnen qol shyǵaryp, jumyla áreket jasap jatyr. Men búgin sizderge Almaty jáne Taraz qalalarynda turatyn Málik Masanov, Harsan Hıımamov, Aısha Lıýshırqyzy, Nurjan О́tepov, Rústem Mashanlo syndy kásipkerler jibergen qaıyrymdylyq kómekti tabys etkeli turmyn. Osynyń ózi bizdiń birligimizdi aıqyndap, aýyzbirligimizdi kórsetip tur. Bul kórgen qıyndyq ta umytylady. Memleket basshysynyń ózi kelip, barlyq kómek kórsetiletinin aıtty. Bizdiń qazirgi mindetimiz – tas-túıin jumylyp, Prezıdenttiń janynan tabylý, qıyndyqty birge eńserý, – dedi A.Quspan.
Bir qyzyǵy, osy gýmanıtarlyq kómek áýeli Aqtóbe qalasyna ákelingen eken. Júktiń bir bóligin Aqtóbeden Qaratóbege jetkizý qajet bolǵan kezde aqtóbelik gazelshilerdiń ýatsap tobyna habarlandyrý jarııalanǵan.
– «Qaratóbege deıin úsh kólik júk jetkizý kerek, aqysy tólenedi», degen habar keldi. Surastyrsaq, tasqynnan zardap shekkenderge gýmanıtarlyq kómek eken. Birden aqysyz-pulsyz ózimiz jetkizip beremiz degen sheshimge keldik. Sóıtip, áriptesterim Sátbek Romanuly, Azamat Temirálın úsheýmiz óz kóligimizben, janarmaıyn ózimiz quıyp, alyp kelip otyrmyz, – deıdi Aralbek Seıpiluly.
Aralbek ózi osy Qaratóbe aýdanynyń Úshana aýlynda týyp-ósken, 2002 jyldan beri Aqtóbede turady eken.
– Prezıdent dál bizdiń aýylǵa kelip, bizben jolyqqanyna erekshe qýandyq. Memleket basshysy barlyq ýaıymymyzdy seıiltip, jubatyp ketti. Sonymen qatar osy kúnderi Qaratóbe aýdany basshylary, jerlesterimiz ǵana emes, elimizdiń túkpir-túkpirinen kóp kómek jetip jatyr. Sonyń bárine alǵysymyz sheksiz. Ramazan aıynda jasaǵan jaqsylyqtaryńyzǵa Alla myń saýap jazsyn, halyq atynan rızashylyǵymyzdy bildiremiz, – deıdi aqqozylyq Aıdana Sadrıdınova.
Dál sol kúni Aqqozy aýly turǵyndaryna qaıyrymdylyq kómek kórsetken taǵy bir top azamattardyń ıgi isine kýá boldyq. «Týǵan aýlymyz sýǵa ketti», degen sýyq habardy estigen kezde, Aqqozy aýlynda týyp-ósken, biraq taǵdyrdyń jazýymen ár tarapta júrgen aýyldastar ýatsap jelisinde bas qosyp, ortaq esepshot ashqan eken. Osylaısha, bir aptanyń ishinde myńnan asa adamnan 22 mln teńge qarajat jınalǵan.
– Biz aýyldastarymyzben kúnde habarlasyp, kúndelikti kerek-jaraǵyn Oraldan jetkizip otyrdyq. Búgin aýyl aqsaqaldarymen aqyldasyp, osy tabıǵat apatynan eń kóp zardap shekken 70 otbasyna 310 myń teńgeden tabys ettik, – deıdi osy aksııany uıymdastyrýshy, oraldyq kásipker Jandos Aıtalıev.
Qaratóbe aýdandyq ishki saıasat bóliminiń basshysy Nurtas Safýllınniń aıtýynsha, aýdan ortalyǵyndaǵy evakýasııalyq bekette jatqan aqqozylyqtarǵa arnalǵan gýmanıtarlyq kómek elimizdiń ár túkpirinen de kelip jatyr eken. Túrkistan oblystyq jastar resýrstyq ortalyǵynyń mamany Aqtóre Meıirjanuly bastaǵan eriktiler arnaıy kelip, tipti aýyl turǵyndaryna arnap eki qazan palaý basyp beripti.
Aıta keteıik, tasqyn sýdan qazir Batys Qazaqstan oblysynyń 6 aýdany qatty zardap shegip jatyr. Olardyń bárine de joǵarydaǵydaı kómek kórsetildi. Oblystyq ortalyq meshit janynan «Qaıyrymdylyq kerýeni» uıymdastyryldy. Meshit jamaǵatynan jınalǵan qarjyǵa aýdandarǵa azyq-túlik, kıim-keshek jiberilip jatyr. Al etnomádenı birlestikterdiń kúshimen sý basqan aýyldarǵa 29 mln teńgeniń járdemi jóneltilgen. «Biz birgemiz Qazaqstan» qaıyrymdylyq qory jáne «Ulttyq volonterlik jeli uıymynyń» qoldaýymen «BQO jastarmen jumys jónindegi resýrstyq ortalyǵynyń» jastary jáne eriktiler sýdan zardap shekken Aqjaıyq aýdanyna da gýmanıtarlyq kómek joldady.
– Bizdiń jastardyń, eriktilerdiń kúshimen osy kezge deıin 250 tonnadan asa qaıyrymdylyq kómek jınalyp, zardap shekkenderge jóneltildi. Eriktiler kelgen zattardy iriktep, qoraptaý isine de atsalysyp jatyr. «Biz birgemiz» qorynan 100 qaıyq, 50 motosorǵy jetti. Jergilikti kásipkerler de barynsha kómektesip, eń aldymen ne kerek ekenin surap, qoldaý kórsetip jatyr. Qazir Oral qalasynda halyqtan qaıyrymdylyq kómek qabyldaıtyn 4 beket ashyldy, – deıdi Batys Qazaqstan oblystyq Azamattyq alıansynyń prezıdenti Aslan Tapıshev.
Batys Qazaqstan oblysy
