foto: azh.kz
Bólingen qarjynyń qomaqty bóligin «Samuryq-Qazyna» qory aýdardy. «Samuryq-Qazyna» sý tasqynynyń saldaryn joıýǵa 15 mlrd teńge bóldi.
«Qor tabıǵı apattan zardap shekken óńirlerge jalpy somasy 15 mlrd teńge kóleminde materıaldyq kómek kórsetedi. Kómekti Qordyń korporatıvtik ortalyǵy, «QazMunaıGaz», «Qazatomónerkásip», «Qazaqstan temir joly», «Qazaqgaz», «Kegok», «Qazaqtelekom», «Eır Astana», «Samuryq-Energo» kompanııalary kórsetti», dedi Nurlan Jaqypov.
Sonymen qatar «Qazaqstan halqyna» qory zardap shekkenderge turǵyn úı salýǵa 5 mlrd teńge bóldi.
Sý tasqynynyń saldaryn joıý maqsatynda Teńizshevroıl kompanııasy 2 mıllıard teńge aýdardy.
- «Teńizshevroıl» JShS (TShO) osyndaı qıyn-qystaý kezeńde Atyraý oblysynyń turǵyndarymen jáne Qazaqstan halqymen birge. Sý tasqynyna qarsy jedel áreket etý sharalaryna jáne jaǵdaı basylǵannan keıin qalpyna keltirý jumystaryna qoldaý kórsetý maqsatynda «Teńizshevroıl» 2 mıllıard teńge qarajat bóldi. Bul qarajat zardap shekkenderdiń turmysyn qalpyna keltirýge septigin tıgizedi dep senemiz», dep málimdedi kompanııa.
Al Chevron kompanııasy sý tasqynynan zardap shekkkenderge 3 mln dollar bóletinin málimdedi (shamamen 1,3 mlrd teńge). Qarajatty kompanııa óziniń jergilikti «Shevron Munaıgaz Ink.» enshiles kompanııasy arqyly bóledi.
Qazaqstannyń taý-ken salasyndaǵy kompanııalary – KAZ Minerals Toby men «Qazaqmys Korporasııasy» JShS sý tasqynynan zardap shekkenderge kómek kórsetý jáne Qazaqstannyń birqatar óńirlerinde tabıǵı apattyń saldaryn joıý úshin 800 mıllıon teńge bóldi.
Sonymen birge Bolat О́temuratovtyń qory sý tasqynynan zardap shekkenderge 680 mln teńge bólgen.
«Bul kúnderi biz mıllıondaǵan otandastarymyz sııaqty, sý tasqynynan zardap shekken óńirlerdiń turǵyndaryna alańdaýshylyǵymyzdy bildire otyryp, kómek qolyn sozamyz. Bólingen qarajat kerek-jaraqtardy satyp alýǵa jáne kómektesýge múmkindik beredi dep úmittenemiz», dedi Bolat О́temuratov atyndaǵy Qordyń dırektory Marat Aıtmaǵambetov.
Eurasian Resources Group sý tasqynyna 500 mln teńge aýdarǵan. Kompanııa munyń aldynda 400 mln teńge, artynan qosymsha 100 mln teńge bólgen.
Halyk banki sý tasqynynan zardap shekken azamattarǵa kómek retinde 1 mlrd teńge bóletinin habarlady.
Dál osy kólemdegi kómekti Freedom Holding Corp. kompanııasy da bóledi. Ol «Freedom Shapaǵat» arnaıy qaıyrymdylyq qorynan «Demeý Qazaqstan qoryna» qarajat aýdaratynyn málimdegen.
Al Jusan Bank sý tasqynynan zardap shekkenderge qoldaý kórsetý úshin 300 mıllıon teńge aýdardy. Kaspi kz 620 mıllıon teńge bóldi. Sondaı-aq Bank SentrKredıt – 200 mln tenge, Eýrazııalyq bank – 200 mln tenge, RBK bank – 150 mln tenge bólgen.
Sonymen qatar Astana Motors – 500 mln teńge, BI Group – 500 mln teńge, Allur, QazTehna jáne Qarmet – 500 mln teńge, PTC Holding – 150 mln teńge, QazaqOil – 150 mln teńge, Oraz Jandosov pen Erlan Qojasbaı - 100 mln teńge bóldi.
Aıta keteıik, joǵaryda kórsetilgen somalardy «Energy Monitor» qoǵamdyq qorynyń dırektory Nurlan Jumaǵulov eseptedi.
