Oblys ákimi Ǵaýez Nurmuhambetov bul jaǵdaıdyń kúrdeli ekenin aıta kelip, turǵyndardy qaýipsiz jerge shyǵarý kerek ekenin jetkizdi.
«Qazgıdromettiń» aıtýyna qaraǵanda, Esildiń sýynyń kóterilýi bógettiń eń bıik núktesi – 415 sm-ge jetkennen keıin tómendeı bastady. О́zenge quıatyn Babyqburlyq, Aqanburlyq, Sharyq, Imanburlyq salalarynyń sý deńgeıi de qazir tómendep jatyr. Qaýipti deńgeı sál tómen tústi.
Endigi qaýip – Esildiń arnasyn toltyrǵan mol sýdyń tolqyny Petropavlǵa qaraı aǵatyn ózen jıeginde ornalasqan aýyldardy basýy. Keshege deıin Petropavl men oblystyń Ǵ.Músirepov, Shal aqyn, Taıynsha aýdandarynda 29 úıdi sý basqan. 77 adamdy evakýasııalap, 226 mal qurǵaq alaptarǵa qýylǵan. Sonyń ishinde Shal aqyn aýdanyndaǵy Jańasý aýylynda sý basqan 5 úıdiń jandary mekteptegi evakýasııalyq pýnktke ornalastyryldy.
Ǵ.Músirepov aýdanynyń ortalyǵy Novoıshım aýylynda sý kirip ketken úıden alty adam qutqarylyp, evakýasııalyq ortalyqqa jetkizildi. Osy aýdan avtojoldarynyń 25 jerinen sý ótip ketti. Olarǵa jol belgileri qoıylyp, júrginshiler qulaqtandyryldy, kúzetter qoıyldy. Sonymen birge kólkigen sý aýyldarǵa kirmes úshin avtojoldar 5 jerden tesilip, sý joldary ashyldy. Qazir eldi mekenderdegi aýlalardan táýligine 30-40 tekshe metr sý sorǵyzylady. 8 600 aryq arshylyp, sýdyń joly ashyldy.
Esildiń Sergeevka qalasynan shyqqandaǵy kúre aǵysynyń boıyndaǵy 19 úıli Jarǵaıyń aýylynyń jandary tolyǵymen kórshiles turǵan, orny bıik, 7 shaqyrym jerdegi О́rnek aýylyna kóshirilip, mektepke ornalastyryldy. Olardyń tósek oryndary men jeıtin tamaqtary aldyn ala ázirlengen. Al 700 qaradaı maldary alysqa aıdalǵan. Shaǵyn aýyldy kóshirýge 41 qutqarýshy 11 tehnıkasymen qatysty. Sondaı-aq Esildiń oń jaq jaǵalaýyndaǵy Nıkolaevka aýylyndaǵy Beregovaıa kóshesiniń turǵyndary da evakýasııalandy. Polısııa qyzmetkerleriniń aralasýymen 22 úıden 64 adam evakýasııa ortalyǵyna jetkizildi. Onyń ar jaǵyndaǵy Birlik aýylynda da 30 adam qaýipsiz ortalyqqa jetkizildi.
О́zen jaǵasyndaǵy Pokrovka, Iаvlenka, Novonıkolsk, t.b. aýyldardaǵy jaǵdaı da osyndaı. Úlken sý Petropavl qalasyna jaqyndap keledi. Qala ákimi Serik Muhamedıev shahar turǵyndaryna BAQ arqyly úndeý jarııalady. Tórtinshi sáýirden beri jergilikti mańyzdaǵy tótenshe jaǵdaı jarııalanǵanyn aıtqan ol, qalanyń Zarechnyı, Teri zaýyty, Teplıchnyı, Podgora kentteri sý basý qaýpinde ekenin aıtty.
«29 saıajaılyq birlestikter de sýdyń astynda qalady. Bul aýdandarda 2 myńnan asa turǵyn bar. Men turǵyndardyń qujattary men baǵaly zattaryn alyp, sýdyń beti qaıtqansha qaladaǵy tanystary men týystaryna bara turýyn suraımyn. Al eshkimi joqtar evakýasııalyq pýnktterge qabyldanady. Kóshe almaǵandarǵa kómek kórsetiledi. Ýaqyt tar, sýdyń kelýin kútpeńizder, asyǵyńyzdar!» dedi ol.
Sonymen birge ol sý basý táýekeli bar aımaqta qalany sýmen qamtamasyz etetin «Qyzyljar-sý» kásiporny da bar ekenin aıtty. Ákim osy kásiporynnyń aınalasyna da bóget salynyp jatqanyn jetkizgen. Osy máseleni naqtylaı túsý úshin kásiporynnyń dırektory Arman Saýtovqa qaıyrylǵanymyzda ol: «Biz eshkimniń buıryǵyn kútpeı-aq 2017 jylǵy tasqynǵa qarsy turǵyzylǵan dambamyzdy 3-4 kúnde jóndep, ony bekitý jumystarymen aınalystyq. Alaıda mamandar kelip kórgennen keıin ony taǵy bir metrge joǵarylatý kerektigi usynyldy. Biz qazir osy jumyspen aınalysyp jatyrmyz. Ákimdik te óz tarapynan kómek berdi», dedi.
Aldaǵy kúnderdiń aýa raıyn boljaǵan «Qazgıdromet» jaqsy habar aıtpaı otyr. 9-10 sáýirde Soltústik Qazaqstan oblysynda uzaq ýaqyt jańbyr jaýyp, ózendegi seńderdiń erýine yqpal etpek. Bul sýdyń kóbeıip, jaıyla túsýine soqtyrýy múmkin. Erimegen seńder keptelip, aǵysty bógeýi nemese onyń jıektegi qurylystarǵa soǵylý qateri bar.
Keshe Astana qalasynda ornalasqan jaıaý áskerdiń 300-deı áskeri Soltústik Qazaqstandaǵy tasqyndy quryqtaý úshin kómekke attandy. Sondaı-aq Ulttyq ulan akademııasynyń 400 kýrsanty da attandyrylmaq. Al TJ mınıstrligi Ulytaý oblysynan 15 tehnıkasy bar 33 qutqarýshyny da soltústikke jiberdi.
Soltústik Qazaqstan oblysy
