Sýretti túsirgen Zamır Ǵabdrahmanov
Sáýirdiń 9-y kúni keshkisin gýmanıtarlyq kómek tıelgen 4 júk kóligi Oral qalasyna kelip toqtady. Aıta keteıik, Alatoodan Aqjaıyqqa bet alǵan bes kóliktiń biri jolda aqaýly bolyp, Aral mańynda qalypty. Biraq jóndelip, jolǵa túsken soń ol da dittegen jerine jetpek.
Aıyr qalpaqty aǵaıyndy Oral halqy jıylyp, qoshemetpen qarsy aldy. Batys Qazaqstan oblysy ákiminiń orynbasary Baqytjan Narymbetov 3000 shaqyrymnan astam joldy artqa tastap, qyrǵyz eliniń amanatyn jetkizgen aǵaıynǵa alǵys aıtty.
«Járdem qolyn sozǵan Qyrǵyz elinen halyqaralyq gýmanıtarlyq kómek Aqjaıyq óńirine jetti. Qıyn kezde qolushyn sozǵan aǵaıynnyń bul jaqsylyǵyn qazaq eli esh ýaqytta umytpaıdy. Alty Alashtyń uldary baýyrlastyǵyn álemge taǵy bir márte pash etti. Tilimiz bir, dilimiz bir, dinimiz bir qyrǵyz aǵaıynǵa qazaq eli atynan aıtar alǵysymyz sheksiz», dedi Baqytjan Narymbetov.
Odan soń Baqytjan Haberuly Qyrǵyz kóshin bastap kelgen Zamırbek Narchaevqa «Qyrǵyz eline Batys Qazaqstan halqynyń atynan myń alǵys» degen jazýy bar dombyrany syıǵa tartty.
«Másele bul kelgen júktiń kóleminde emes. Qazaq halqynyń basyna kún týǵanda eń aldymen kómek qolyn sozǵan qyrǵyz aǵaıynnyń yqylas-nıetine rızamyz!», deıdi Májilis depýtaty Abzal Quspan.
Baýyrlas elden kelgen toptyń basshysy, Qyrǵyz Respýblıkasy Tótenshe jaǵdaılar mınıstrliginiń ókili, podpolkovnık Zamırbek Narchaev Oral qalasyna 28 adam kelgenin, sonyń 8-i qutqarýshy ekenin jetkizdi.
«Prezıdentimizdiń tapsyrmasyna sáıkes, Qyrǵyzstan elinen jetkizilgen 300 tonnadan astam gýmanıtarlyq kómek Qazaqstannyń tórt oblysyna bólindi. Oral qalasyna sonyń 80 tonnasyn jetkizdik. Munda azyq-túlik, tósek-oryn, turmysqa eń qajetti buıymdar bar», dedi Zamırbek Narchaev.
Batys Qazaqstan oblysy
