2016 jyldan bastap qalada aqyly avtoturaq jobasy iske qosyldy. Sol kezde olardyń jalpy sany 486 bolǵan. 2023 jyly aqyly avtoturaqtardyń sany 7 myńnan asty.
«Búginde Astanada 7200 aqyly avtoturaq bar. 2025 jyly aqyly avtoturaqtardyń sanyn 10 myńǵa jetkizgennen keıin kompanııaǵa («Parkovochnoe prostranstvo Astany» – aqyly turaqtarǵa qyzmet kórsetetin JShS) ózderiń (qardy) tazartasyńdar, jolǵa asfalt tóseısińder, jol belgisin ózderiń qoıasyńdar dep talap qoıyp jatyrmyz. Bul máseleni 2025 jyly kún tártibine shyǵaramyz. Bul jumystardy júrgizý úshin aqyly turaqtyń tarıfin kóterý kerek», dedi Ashat Qaraǵoıshın Astana qalasy qoǵamdyq keńesinde.
Búginde aqyly avtoturaqtyń tarıfi – saǵatyna 100 teńge.
Basqarma basshysy bul turaqtardan jergilikti bıýdjetke qomaqty qarjy túskenin atap ótti.
«Búginde aqyly avtoturaqtardan 4 mlrd 228 mln teńge bıýdjetke tústi. Onyń 474 mln teńgesi («Parkovochnoe prostranstvo Astany») kompanııasyna berildi», dedi ol.
«Parkovochnoe prostranstvo Astany» JShS dırektory Shyńǵys Dosybaev aqyly avtoturaqtardan túsken jıyntyq tabystyń 90 paıyzy jergilikti bıýdjetke, 10 paıyzy kompanııaǵa túskenin atap ótti.
