foto: ulysmedia.kz
Atbasar aýdany ákimdiginiń resmı paraqshasynda ákim Amanbek Qaljanovtyń jergilikti turǵyndarǵa úndeýi jarııalandy.
«Jabaı ózeninde sý deńgeıiniń kúrt kóterilýine baılanysty osy jyldyń 11 sáýiri kúni saǵat 04:43-te jer qorǵanynyń alty bóliginde sý tasqyny bolyp, qalany sý basyp qaldy. Sý deńgeıi qarqyndy ósip, 5,95 m synı deńgeıge jetti. Sondyqtan sý tasqyny qaýpi bar aımaqtyń barlyq turǵyndary turǵyn úılerden shyǵýy kerek. Qazirgi ýaqytta aýdanda tótenshe jaǵdaı jarııalandy», dedi aýdan basshysy turǵyndar aldynda.
Osy tusta ákim turǵyndardy úreılenbeýge shaqyrdy.
Atbasar qalasynda №2, 3, 5, 6, 7 mektepterde, «Olımp» FOK, Balalar mýzyka mektebinde ornalasqan evakýasııalyq pýnktter uıymdastyrylady.
«Sý tasqynynan zardap shekken turǵyndarǵa keltirilgen shyǵyn óteledi, bul úshin komıssııa qurylyp, apatty úıler tekseriledi. Meniń jetekshiligimmen aýdan ákimdigi janynan sý tasqynyna qarsy shtab uıymdastyryldy», dep túıindedi A.Qaljanov.
