Senat Tóraǵasy túsindirgendeı, áıelderdiń quqyqtary men balalardyń qaýipsizdigin qamtamasyz etý týraly zań ata-ana quqyǵynan aıyrýdy kózdemeıdi. Qujat erejeleri áıelder men balalardyń qaýipsizdigin arttyrý maqsatynda ázirlendi.
Máýlen Áshimbaev túsindirgendeı, eger ata-ana óziniń balasyna zııan keltirgen bolsa, tıisinshe jaýapqa tartylady.
«Eger ata-ana balasyna qatigezdikpen qarap, zorlyq-zombylyq áreketterine barsa, tıisti organdar qoldanystaǵy zańnamaǵa sáıkes ata-anany quqyqtarynan aıyrý týraly máseleni kótere alady. Mundaı máselelerdi memlekettik organdar qaraıdy, odan ári sotta qaralady jáne tek sot sheshim qabyldaı alady. Al sot balanyń múddesine negizdelip sheshim qabyldaıdy», dedi M.Áshimbaev.
Eske salaıyq, búgin senatorlar Palata otyrysynda «QR-nyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy jáne oǵan ilespe «QR-nyń Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańdy eki oqylymda maquldady.
