Irikteýge myqtylar barady

Boks  elimizdiń basty sporty eke­ni taǵy bir ret dáleldengendeı. Ishki sparrıngtik irikteý bá­sekesiniń ózi jankúıerler arasynda úlken qyzyǵýshylyq týǵyzdy. Al lısenzııalyq týrnırge qatysýdan úmit­kerler arasynda sparrıngtik báseke ótkizý týraly bas­tama Qazaqstan boks federasııasynyń ashyqtyq ustanymy bolatyn. Jekpe-jek úsh kún boıy «qazsport» telearnasynda tikeleı efırde kórsetilip, tipti jerebe tartý rásiminiń ózi kópshilik nazaryna tikeleı kórsetilim arqyly usynyldy. Ulttyq quramanyń bapkerleri de úmitker boksshylardy taǵy bir baǵalaı aldy.

Erler arasynda sparrıngtik kezdesý 63,5 kg salmaq dárejesinde ótti. Oǵan bes boksshy qatysty. Fınalda túrkistandyq Muhammedsabyr Bazarbaıuly men jambyldyq Dýlat Bekbaýov kezdesti. Alǵashqysy osy salmaqta ótken jyly el chempıony atanǵan. Al buǵan deıin 67 kılo salmaqta óner kórsetip júrgen Dýlat úshin bul jańa salmaqtaǵy bar bolǵany ekinshi judyryqtasý edi. Tartysty ótken jekpe-jektiń birinshi raýndy 3:2 esebimen Muhammedsabyrdyń paıdasyna sheshildi. Ekinshi raýndta bes tóreshi de Bazarbaıulynyń basymdyǵyn baıqady. Al úshinshi raýndta 5:0 ese­bimen Bekbaýov basym boldy. Qory­tyndysynda tóreshilerdiń basym daýsy­men Muhammedsabyr Bazarbaıuly je­ńiske jetti.

Qyzdar arasynda sparrıngtik báseke 4 salmaqta ótti: 50 kg, 54 kg, 66 kg, 75 kg salmaq dárejelerinde sharshy alańǵa barlyǵy 18 boksshy shyqty. Aldymen jeńil salmaqtaǵy boksshylar arasynda jeńimpaz anyqtaldy. 50 kg sparrıngte Alýa Balqybekova men Nazym Qyzaıbaı synǵa tústi. Tóreshiler sheshimimen Nazym jeńiske jetti.

Segiz boksshy qatysqan 54 kılo sal­maq­taǵy bá­seke óte tartysty boldy. Fınalda Uljan Sársenbek pen Sym­bat Álıasqardyń joly túıisip, túrkis­tandyq Uljan 5:0 esebimen basym boldy.

66 kılo salmaq dárejesinde 5 boks­shy synǵa túsken edi. Fınalda byltyrǵy spartakıadanyń jeńimpazy, Soltústik Qazaqstan oblysynyń ókili Natalıa Bogdanova qaraǵandylyq Jasmın Qı­zatovamen kezdesti. Tóreshilerdiń hat­tamasynda 4:1 esebi tirkelip, Bog­danova óziniń myqtylyǵyn kórsetti.

Al 75 kıloda úsh boksshy baǵyn synap, fınalda astanalyq Valentına Halzova men qyzylordalyq Gúlsaıa Erjan kezdesti. Alǵashqysy byltyr osy salmaqta spartakıada jeńimpazy bolǵan, ekinshisi – 81 kılo salmaq dárejesiniń úzdigi. Alaıda bir salmaq dárejesine tómen túsken Gúljan aqtyq aıqasta Halzovaǵa qarsylyq kórsete almady. Tóreshilerdiń sheshimimen Valentına jeńiske jetti.

Endi boksshylar Bangkokte ótetin álemdik lısenzııalyq týrnırge daıyndalady. Sparrıng jeńimpazdary birinshi nómirli retinde tirkelmek. Degenmen áıelder arasynda lısenzııalyq týrnırde taǵy bir salmaq dárejesinde boksshymyz barady. Alaıda 60 kılodaǵy sparrıng osy salmaqtaǵy byltyrǵy chempıon Rımma Volosenkonyń jaraqatyna baılanysty keıinge qaldyryldy. Spar­rıngtik kezdesýdi Volosenko oqý-jat­tyǵý jıyny aıasynda taǵy bir úmit­ker Vıktorııa Grafeevaǵa qarsy ótkizedi.

Bokstan Qazaqstan erler qurama­synyń bas bapkeri Myrzaǵalı Aıtjanov Astanadaǵy irikteý týrnıriniń qorytyn­dysy týraly óz pikirin bildirdi.

«Irikteý ádil ótti. Jankúıerler tele­dıdardan qarap, kimniń qandaı daıyn­dyqpen kelgenin, qalaı judy­ryq­tasqanyn kórdi. Erler arasynda synǵa túsken bes boksshy jaqsy daıyn­dyqpen keldi. Sebebi árkim Olımpıadaǵa barýdy armandaıdy. Barlyǵy qoldan kelgenniń bárin jasady.

Jeńimpazǵa keletin bolsaq, Muham­medsabyr Bazarbaıuly Italııada ótken irik­teýde súrindi. Bul joly ol kóshbas­shylyqty dáleldeý arqyly taǵy da óz múm­kindigine ıe bolyp otyr. Bizdiń bas­ty maq­satymyz – Olımpıadaǵa lısenzııa alý.

Daıyndyq jospar boıynsha ótip jatyr. Kýba jáne О́zbekstanmen bir­lesken jıyn ótkizemiz. Sodan keıin mamyr aıynda halyqaralyq týrnırge qa­tysyp, onda boksshylardyń daıyndyǵyn tekseremiz», dedi M.Aıtjanov.