Foto: Akorda.kz
Prezıdent eki eldiń arasynda altyn kópir bolǵan rýhanı-mádenı baılanystar qazaq-armıan yntymaqtastyǵynyń qarqyndy damyǵan baǵytynyń biri ekenin atap ótti.
Memleket basshysynyń aıtýynsha 2006 jylǵy 6 qarashadaǵy Mádenıet salasyndaǵy yntymaqtastyq týraly úkimetaralyq kelisim - bazalyq qujat. Budan basqa, salalyq mınıstrlikter men vedomstvolar arasynda memorandýmdar men yntymaqtastyq baǵdarlamalaryna qol qoıyldy, olardyń negizinde mádenı-bilim berý jáne ǵylymı-zertteý almasýdyń túrli baǵyttary boıynsha júıeli jumys júrgizilip jatyr.
«Qazaqstan Armenııadaǵy qazaq halqy murasynyń qurmettelýin joǵary baǵalaıtynyn erekshe atap ótkim keledi. Erevanda Jambyl jáne Almaty esimdi kósheler bar ekenin bilemin. 2010 jyldan bastap Erevan memlekettik ýnıversıtetiniń túrkologııa kafedrasynda Abaı atyndaǵy Qazaq tili, mádenıet jáne tarıh ortalyǵy jumys isteıdi. О́z kezeginde elordada Aram Hachatýrıan atyndaǵy kóshe, Almatyda Armıanskaıa kóshesi ashyldy. Birlesken josparda biz halqymyzdyń uly uldary qurmetine jańa kósheler ashýdy qarastyramyz. Árıne, mundaı oqıǵalardyń tereń maǵynasy bar jáne olardy eki eldiń ǵylymı jáne shyǵarmashylyq qoǵamdastyqtary zor yqylaspen qabyldaıdy», dedi Prezıdent.
Memleket basshysynyń sózinshe 2023-2025 jyldarǵa arnalǵan mádenıet salasyndaǵy baǵdarlama sheńberinde mýzyka jáne horeografııa óneri, murajaı jáne kitaphana isi, kıno jáne tarıhı-mádenı mura salalaryndaǵy yntymaqtastyqty nyǵaıtý kózdelgen.
«Bizdiń elderimiz dástúrli túrde túrli birlesken is-sharalar, sonyń ishinde festıvaldar, kórmeler, konsertter men teatrlandyrylǵan qoıylymdar ótkizedi. 2023 jyly Erevanda Qazaqstannyń belgili ánshisi Dımash Qudaıbergenniń jeke konserti, Armenııadaǵy Qazaq teatry kúnderi, Almatydan M.Áýezov atyndaǵy Qazaq ulttyq teatry men Qostanaıdan kelgen oblystyq drama teatry ujymynyń gastrolderi ótti. О́z kezeginde Qazaqstanda kórnekti kompozıtor jáne dırıjer Aram Hachatýrıannyń týǵanyna 120 jyl tolýyna arnalǵan armıan ujymdarynyń konsertteri ótti», dedi Qasym-Jomart Toqaev.
Prezıdent bıyl kúzde Qazaqstanda Armenııanyń mádenıet kúnderin ótkizý josparlanyp otyrǵanyna toqtaldy. Aıtýly is-sharada kórermender Armenııanyń shyǵarmashylyq ómirimen keńinen tanysý múmkindigine ıe bolady.
«Bilim salasyndaǵy jáne eki eldiń jastary arasyndaǵy baılanystardy nyǵaıtý úshin de áleýet jetkilikti.
Jastar elderimizdegi oń ózgeristerdiń lokomotıvi bolyp qana qoımaıdy. Eki memleket arasyndaǵy yntymaqtastyqty dostyq, qurmet jáne ózara túsinistik negizinde odan ári nyǵaıtý - dál osy jastardyń mindeti.
Osyǵan baılanysty biz úshin bilim berý jáne stýdenttik almasýlardy qoldaý ózekti mindet bolyp tabylady», dedi Memleket basshysy.
Sonymen qatar, Prezıdent eki eldiń sportshylary Qazaqstan men Armenııada ótkiziletin túrli jarystarǵa únemi qatysyp júrgenin, Armenııanyń ulttyq quramasy bıyl qyrkúıek aıynda Astanada ótetin 5-shi Dúnıejúzilik kóshpendiler oıyndaryna shaqyrylǵanyn atap ótti.
«Meniń Erevanǵa aldaǵy saparym barysynda Qazaqstan men Armenııanyń ýákiletti mınıstrlikteri dene shynyqtyrý jáne sport salasyndaǵy 2024-2026 jyldarǵa arnalǵan yntymaqtastyq baǵdarlamasyna qol qoıady. Mádenı, stýdenttik, sporttyq delegasııalarmen almasý bizdiń halyqtarymyzdy jaqyndastyrýdyń, azamattar arasynda baılanys pen dostyq ornatýdyń, týrızmdi damytýdyń mańyzdy tuǵyrnamasyna aınalýy tıis», dedi Qasym-Jomart Toqaev.
