Foto: Ýıkıpedııa
Prezıdent armıan qaýymy Qazaqstannyń etnıkalyq palıtrasynda erekshe orny bar ekenin, Qazaqstan qoǵamynyń ajyramas bóligi ekenin atap, elimizde 20 myńnan astam armıan halqynyń ókilderi turatynyn, 31 armıan etnomádenı birlestigi jumys isteıtinin, olardyń qyzmeti ulttyq mádenıetti, tildi, dástúrler men tarıhty dáripteýge baǵyttalǵanyn tilge tıek etti.
«Etnosaralyq jáne konfessııaaralyq kelisimniń otandyq modeli – bul bizdiń elimiz álemde tanylatyn mańyzdy ólshemderdiń biri. Qazaqstan 130 etnos pen 17 dinı konfessııanyń ortaq úıine aınaldy. Osyndaı ár alýandylyqpen Qazaqstan etnosaralyq birliktiń biregeı modelin ázirledi jáne osy ár alýandylyqty qoǵam paıdasyna aınaldyra aldy. 2003 jylǵy qyrkúıekte Astanada Álemdik jáne dástúrli dinder kóshbasshylarynyń birinshi sezi ótkeni belgili. Atalǵan forým Qazaqstannyń syrtqy saıasatynyń tanymal brendine aınalyp, álemdik qoǵamdastyqta keńinen tanyldy. Armenııa Respýblıkasy bul bastamany belsendi qoldaıdy. Armıan Apostol shirkeýiniń ókilderi Sezd jumysyna turaqty túrde qatysyp keledi», dedi Memleket basshysy.
Prezıdent búginde memlekettik etnosaıasatty iske asyrý boıynsha Qazaqstan halqy Assambleıasyna (QHA) mańyzdy ról berilgenin, 2022 jyldan bastap QHA joǵary zań shyǵarýshy organ – Qazaqstan Respýblıkasy Parlamentiniń Senatynda tanystyrylǵanyn atap, Qazaqstandaǵy armıan etnos ókilderi qazaq qoǵamynyń belsendi músheleri bolyp tabylatynyn jáne Qazaqstan halqy Assambleıasynyń qatysýshylary retinde bizdiń memleketimizdiń damýyna jáne armıan mádenıetin ilgeriletýge eleýli úles qosyp kele jatqanyn aıtty.
«Olardyń negizgi qyzmetin tolyqqandy júzege asyrý úshin armıan etnomádenı birlestikterine basqa etnostarmen birdeı el óńirlerindegi dostyq úılerinde úı-jaılar berilgen. Jeksenbilik til mektepteriniń, bı jáne mýzyka ujymdarynyń jumysy úshin jaǵdaı jasalǵan, bul ulttyq mádenıet pen dástúrdi saqtaýǵa jáne damytýǵa yqpal etedi. Búginde armıan qaýymy ókilderi Qazaqstanda etnosaralyq kelisimdi nyǵaıtý jónindegi memlekettik saıasatty iske asyrýǵa tikeleı qatysyp jatyr. Jalpy, ýaqyt synynan ótken qazaq-armıan dostyq pen ózara túsinistiktiń eń jarqyn bolashaǵy bar dep senimmen aıta alamyn», dedi Memleket basshysy.
