«Qazir elimizdegi sý tasqynymen kúres qarqyndy júrip jatyr jáne onyń qaýpi áli báseńdegen joq. Qarǵyn sýmen kúreske qoldaǵy barlyq kúsh pen rezerv, adam resýrsy men qajetti tehnıkalar túgel jumyldyryldy. Sý basqan óńirlerdiń turǵyndary, olarmen birge 20 myńnan astam volonter memlekettik organdarmen birigip jumys istep jatyr. Otandastarymyz aýyzbirlik pen janashyrlyq tanytyp, judyryqtaı jumyldy. О́z kásibine adal tótenshe jaǵdaı qyzmetkerleri, áskerı qyzmetshiler, ishki ister qyzmetkerleri men memlekettik qyzmetshiler táýlik boıy jumys istep jatyr. Qazir árbir adam, árbir tehnıka men eńbek kúshi óte mańyzdy. Kóp resýrsty qajet etetin osy bir qıyn sátte biz aqparat taratýda dál osyndaı júıeli túrde qımyldap, úlken jaýapkershilik tanytýymyz qajet», dedi mınıstr.
Aıda Balaevanyń aıtýynsha, aqparat salasyna júrgizilgen monıtorıng barysynda jalǵan aqparat deńgeıindegi 29 fakt anyqtalǵan. Ol habarlamalardyń barlyǵyna ýákiletti organdar tarapynan tıisti tekserý júrgizilip, shynaıy emes ekeni belgili bolyp otyr. «Jalǵan aqparattar kóbine messendjerler arqyly taralady. Eń kóp taraǵan aqparattar qataryna bógetterdiń buzylýy, respýblıkalyq mańyzy bar joldardy sý basýy, sý qoımalaryndaǵy, elektr stansalaryndaǵy jáne basqa da strategııalyq obektilerdegi apattar, aýyz sýdyń lastanýy, evakýasııalaý oryndary, qarajat jınaý jáne tóleý týraly jalǵan málimetter jatady», dedi mınıstr.
Ol Aqtóbedegi sý qoımasy shlıýzderin ashý týraly áleýmettik jelide jalǵan aqparatty keıin Aqtóbe oblysynyń ákimdigi joqqa shyǵarǵanyn, sondaı-aq Qostanaı oblysynyń ákimdigi B.Maılın aýdanyndaǵy Aıat ózeni arqyly ótetin kópirdiń bir bóliginiń qulaýy, óńirdegi mal qorymdaryn sý basqany týraly habarlamany resmı túrde teristegenin mysalǵa keltirdi. Osy faktiler boıynsha tótenshe jaǵdaılar qyzmetkerleri sol jerlerge arnaıy barǵanymen, aqparattyń rastalmaǵanyn erekshe atap ótken sala basshysy basqa jerde shyn kómekke muqtaj jandar kútip otyratynyn, olardyń arasynda balalardyń bar bolýy múmkin ekenin umytpaýǵa shaqyrdy. Onyń aıtýynsha, Densaýlyq saqtaý mınıstrligi de sý basqan aýmaqtarda juqpaly aýrýlardyń órshý qaýpi jáne epıdemıologııalyq qyzmet tarapynan jaǵdaıdy baqylaýdyń jetkiliksizdigi týraly jalǵan aqparat taraǵanyn málimdep otyr.
«Tasqynnan zardap shekkenderge arnalǵan tólemder týraly da ádeıi jalǵan habarlamalar taratý úlken qaýip tóndiredi. Keıingi kúnderi sý tasqynynan zardap shekkenderge Memleket basshysy tarapynan ýáde etiledi degen mıllıondaǵan dollar tólemderi, Premer-mınıstr men Úkimet músheleriniń atynan aqshalaı qarajat jınaý týraly jalǵan habarlamalar paıda boldy. Mundaı aqparatqa senbeýge shaqyramyn. Alaıaqtar sý tasqyny jaǵdaıyn ózderiniń jeke maqsatyna paıdalana bastady. Teris nıettiler azamattardyń jeke derekteri men qarjylyq resýrstaryn urlaý úshin ınternette «Tólemder úshin JSN-di tekserińiz», «3 mıllıon teńgege deıin ótemaqy alý», «Memleketten múmkindiginshe tezirek járdemaqy alý» degen sııaqty habarlamalar jarııalaıdy», dep atap ótti Aıda Balaeva.
Mádenıet jáne aqparat mınıstri jarnamalaryn senimdi kórsetý úshin qylmyskerler otandyq bankter men memlekettik mekemelerdiń ataýyn paıdalanatynyn, mysaly, Facebook, Instagram jáne Telegram jelilerinde Eńbek jáne halyqty áleýmettik qorǵaý mınıstrliginiń ártúrli bankpen birlesip tóleıtin tólemderi týraly habarlamalar jıi jarııalanatynyn jetkizdi. Sondaı-aq Qarjy mınıstrligi jańa qaýly qabyldap, shyǵynnyń ornyn toltyryp jatyr eken degen jalǵan aqparat júrgenin aıtty. Adamdardy jańylystyrý úshin alaıaqtar ár jazbanyń astyna alǵyssózderi bar bot pikirlerin jazady.
«Bul kórineý jalǵan habarlamalardyń barlyǵy memlekettik organdar arqyly jedel teriske shyǵarylyp, barlyq fakti boıynsha quqyq qorǵaý organdaryna habarlamalar jiberildi. Barlyq anyqtalǵan zańsyz faktilerge quqyqtyq baǵa berý, jedel-izdestirý jáne is júrgizý úshin materıaldar quqyq qorǵaý organdaryna joldandy. Sondyqtan tek resmı jáne rastalǵan aqparatqa senińizder. Barlyq kúmándi faktilerdi birneshe ret tekserińiz jáne kúmándi habarlamalardy ári qaraı taratpańyz!», dep eskertti mınıstr.
Aıda Balaeva barlyq jalǵan habarlamanyń maqsaty – úreı týdyrý, halyqty jikke bólý, memlekettik qyzmetshiler men volonterlerdiń kelisilgen jumysyn uıymdastyrýdy buzý jáne qarapaıym halyqtyń qaıǵy-qasiretin paıdalanyp tez paıda tabý ekenin atap ótti. «Sondaı-aq sý tasqyny men zardap shekken óńirlerdi qalpyna keltirý sharalaryn obektıvti túrde jarııalap júrgen BAQ ókilderine arnaıy alǵysymdy bildirgim keledi» dedi mınıstr.
