Batys Qazaqstan oblystyq Tótenshe jaǵdaılar departamentiniń aǵa ınjeneri Nurjan Tóleýishtiń aıtýynsha, óńirde Bórli aýdanynyń – 9, Báıterek aýdanynyń – 20, Terekti aýdanynyń – 19, Aqjaıyq aýdanynyń – 32 eldi mekenine, Oral qalasynyń 4 aýdanyna naqty qaýip bar.
Jaıyq ózeniniń sýy qarqyndy kóterilip jatyr, qaýipti deńgeıge jetýi jaqyn. Barlyq kúsh-qural qazir ózen boıynda, tasqynnyń aldyn alýǵa jumyldyrylǵan. Oralǵa elimizdiń 7 oblysynan kómek kelip, joǵarydaǵy eldi mekenderge bólingen. «Qazir geodezıster jumys istep jatyr, qalanyń tómen ornalasqan aýdandaryn anyqtap, halyqty kóshirip jatyr», dedi tótenshelikter ókili.
Sáýirdiń 15-i kúni Jaıyq ózeni jaǵalaýynda ornalasqan birneshe eldi mekenge evakýasııa jarııalandy. Eń aldymen balalar men analar, qarııalar, múmkindigi shekteýli jandar qaýipti aımaqtan shyǵý, úı janýarlaryn ýaqytsha kóshirý eskertilip jatyr. Oral qalasynyń ákimi Mırjan Satqanov: «О́zen jaıylmasyndaǵy eldi mekender men saıajaı úılerin sý basý qaýpi joǵary. Ásirese, Oral qalasynyń Kýrenı, Starısa, Komıntern, Samal, Jas natýralıster stansasy, oblystyq aýrýhana aýmaǵynda turatyn halyqqa evakýasııa isteýimiz qajet», dep habarlady.
Tasqyn qaýpine baılanysty Oral qalasynda sý basý qaýpi tóngen №27 mekemesinde jazasyn óteýshiler shuǵyl túrde ózge óńirlerge – Aqtóbe, Taraz, Shymkent jáne Qyzylorda qalalaryna kóshirilgen.
Mamandardyń aıtýynsha, Reseıden sýdyń mol kólemi bir-eki kúnde Oral qalasyna jetedi. Qaýipti deńgeı 8,5 metr bolsa, qazirdiń ózinde Jaıyqtyń deńgeıi 8 metrge jýyqtap qaldy. Sý tasqynyna qarsy jumysqa jergilikti atqarýshy organnyń jáne tótenshe jaǵdaı qyzmetiniń barlyq resýrsy tartylǵan. Qazir 350 arnaıy tehnıka, 2 myńǵa jýyq adam tasqynǵa tosqaýyl qoıýǵa jumyldy.
Oral qalasyndaǵy «Batys» óńirlik qolbasshylyǵynyń baspasóz qyzmeti óńirde Qaraǵandy, Qyzylorda, Shymkent qalalarynan kelgen myńǵa jýyq ulandyq sarbaz ben 40-tan asa tehnıka júrgenin habarlady. Sarbazdar el basyna kún týǵan sátte oılanbastan kómekke umtylyp, erliktiń eren úlgisin kórsetip jatyr. 14 sáýirde Oral qalasy mańyndaǵy eldi meken turǵyndaryn evakýasııalaý barysynda 30-ǵa jýyq adam otyrǵan júk kóligi tasqyn sýdyń ortasynda qalyp qoıdy. Sol jerde kezekshilikte turǵan Ulttyq ulan 5517 áskerı bóliminiń qyzmetkeri Máýlen Márlenov jedel qımyldady. О́ziniń júk kóligimen topan sýdyń ortasyna qoıyp ketip, batyp qalǵan kólikti qaýipsiz jerge súırep shyǵardy. Mundaı oqıǵa kóp.
Sáýirdiń 15-inen bastap Jaıyq ózeniniń jaǵalaýynda ornalasqan Aqjaıyq, Bórli, Báıterek, Terekti aýdandarynyń jáne Oral qalasynyń orta bilim berý, kásiptik-tehnıkalyq jáne qosymsha bilim berý uıymdary qashyqtan oqýǵa kóshkenin habarlaǵan edik. Bul bastamaǵa Mahambet atyndaǵy Batys Qazaqstan ýnıversıteti de qosylyp, stýdentterdi eriktiler qataryna qosylýǵa shaqyrdy.
Keshe Almaty oblysynan kelgen 150-den asa tehnıka, onyń ishinde tıeý, ınjenerlik, júk jáne sý tasıtyn tehnıkalary jáne motorly qaıyqtar tıisti jerge jóneltildi. Batys Qazaqstan jáne Aqtóbe oblysynyń TJD qutqarýshylary Terekti aýdany Toqpaı aýylynda jaǵalaýdy nyǵaıtyp jatsa, Qyzylorda oblysynan kelgen tótenshelikter Oral qalasyndaǵy Jaıyq ózeniniń jaǵalaýyn kóterip jatyr. Al TJM-nyń 52859 áskerı bólimi sarbazdary osy saǵatta Báıterek aýdanyna qarasty Iаnvarsev eldi mekeninde júr. Aıta keteıik, Reseı aımaǵynan kele jatqan alapat tasqyndy alǵash qarsy alatyn da – osylar.
Batys Qazaqstan oblysy
