Sýretterdi túsirgender – A.Dúısenbaev, E.ÚKIBAEV
Oblys ákimi Qumar Aqsaqalov sý tasqynyna baılanysty óńirdegi alty aýmaqta tótenshe jaǵdaı jarııalanǵanyn aıtty. Oblystaǵy 492 aýyldyń 11-i sý tasqynynan zardap shekti. Qazirgi kezde jaǵdaı turaqtaldy. Alaıda áli de 51 úı sý astynda qalyp otyr. Budan bólek, 4 kópirdi, 7 jol ýchaskesin sý shaıyp ketken, 1414 elektr baǵanyna nuqsan keldi. Sonyń saldarynan Qostanaı men oblystyń ońtústigindegi aýdandar arasynda kólik qatynasy kúrdelenip, 13 eldi mekendi elektrmen qamtamasyz etýde qıyndyq týdy.
Sonymen qatar Prezıdentke oblystyń negizgi gıdrotehnıkalyq nysandarynyń, atap aıtqanda Qaratomar, Joǵarǵy Tobyl, Jelqýar sý qoımalarynyń jaı-kúıi jóninde málimet berildi. Qumar Aqsaqalov eldi mekender men ınfraqurylymdarǵa tónetin qaýiptiń aldyn alý úshin sý qoımalarynan jiberiletin sý mólsheri udaıy baqylaýda ustalatynyn aıtty.
Jalpy, óńirdegi dambalardy bekitý, ınertti materıaldardy tógý nátıjesinde Tobyl qalasyn, Amangeldi aýdanynyń ortalyǵyn, basqa da eldi mekenderdi sý basý qaýpinen saqtap qalý múmkin bolǵan.
Prezıdent Tobyl qalasynda ornalasqan jedel shtabta sý tasqynynan zardap shekken Qostanaı aýdanyna qarasty aýyldardyń turǵyndarymen kezdesti.
Kezdesýde Qasym-Jomart Toqaev azamattyq belsendilik tanytqan jáne apatqa beıjaı qaramaı janashyrlyq bildirgen barsha jurtshylyqqa alǵys aıtyp, halyqtyń birligi osyndaı qıyn kezeńde aıqyn kórinetinin atap ótti.
– Men sizdermen júzdesý úshin arnaıy keldim. Jaǵdaıdyń kúrdeli ekenin túsinemin. Memlekettiń barlyq resýrsy osy máseleni sheshýge baǵyttalyp jatyr. Prezıdent retindegi meniń basty mindetim – sý tasqynynan zardap shekken turǵyndarǵa barynsha kómek kórsetý, – dedi Memleket basshysy.
Prezıdent memlekettiń qarjysyn qatań únemdeý rejimi engizilgenin, qarajat zardap shekken halyqqa bólinetinin jetkizdi. Memleket basshysy barlyq zardap shekken turǵynǵa qajetti kómek kórsetiletinin aıtty.
– О́temaqy – basty másele. Shyǵyn óteledi. Sonymen qatar turǵyn úıi jaramsyz azamattarǵa jańa baspana salynady jáne jóndeýge jaramdy úıler qaıta qalpyna keltiriledi. Oǵan qajetti barlyq qarajat bólinedi. Kim páterge kóshkisi kelse, biz páter satyp alyp beremiz. Kim óz qonysynda qalǵysy keledi, olarǵa tıptik úlgidegi úıler salamyz. Degenmen qaýipti jerlerde qalýǵa múlde bolmaıdy. Mundaı úılerdiń jobasy bar. Bul úıler qysqa deıin tolyqtaı salynady. Men Úkimetke aldaǵy jaz mezgilinde, sondaı-aq kúzde barlyq qurylys jumystaryn bitirý jáne apat saldaryn tolyq joıý jóninde mindet júktedim, – dedi Prezıdent.
Sonymen qatar Memleket basshysy sý tasqynynyń saldaryn eńserý úshin ár aımaqqa eldiń iri kásipkerleri bekitiletinin atap ótti.
О́z kezeginde turǵyndar sý tasqynynyń zardaptaryn joıýǵa jedel kómek kórsetilip, qutqarý jumystarynyń ýaqytyly júrgizilgeni úshin alǵystaryn bildirdi. Olardyń aıtýynsha, bul apat halyqtyń birligin aıqyn kórsetti. Tabıǵat apatynyń alǵashqy kúnderinen bastap eriktiler, memlekettik qyzmetshiler, quqyq qorǵaý organdary men Tótenshe jaǵdaılar mınıstrliginiń qyzmetkerleri, jalpy janashyr adamdardyń barlyǵy jan-jaqty kómek kórsetýge umtylǵan.
Prezıdent qazaq dalasynyń rámizi sanalatyn aqbókenderdiń kóbeıýine tosqaýyl qoıatyn sheshimniń kúshin joıyp, oǵan tyıym salynatynyn málimdedi.
Kezdesý sońynda Memleket basshysy kelesi jyly Alash ardaqtysy Mirjaqyp Dýlatovtyń 140 jyldyǵyna arnalǵan is-sharaǵa qatysý úshin Arqalyq qalasyna barýdy josparlap otyrǵanyn jetkizdi.
Memleket basshysy Qostanaı oblysyna jumys sapary barysynda sý tasqyny saldaryn eńserýge járdemdesken bıznes ókilderi jáne eriktilermen de júzdesti.
Kezdesýge óńirdegi mashına jasaý, taý-ken, tamaq jáne aýyl sharýashylyǵy ónerkásibi salalarynyń jetekshileri, Qazaqstan halqy Assambleıasynyń jergilikti ókilderi, oblystyq jastar resýrstyq ortalyǵynyń eriktileri jáne stýdentter qatysty.
Qasym-Jomart Toqaev shaǵyn jáne orta bızneske qoldaý kórsetý basty mindet ekenin atap ótti.
– Osy kezdesýge biraz mesenat qatysyp otyr. Men sizderge rızashylyǵymdy bildiremin. Bul – sizderdiń júrek qalaýlaryńyz, azamattyq jaýapkershilikterińizdiń kórinisi. Munyń bárin marapat úshin emes, shynaıy nıetpen jasalǵan ıgi is dep bilemin, – dedi Prezıdent.
Memleket basshysy sý tasqynynan zardap shekken halyqqa naqty kómek kórsetý isinde bıznesmenderdiń róli zor ekenine aıryqsha nazar aýdardy.
– Bizdiń elimizde «Forbes» tizimine kiretin iri kásipkerler bar. Olarmen arnaıy kezdesemiz. Olar ár oblysqa, aýdanǵa, eldi mekenge bekitiledi jáne naqty jaýapkershilik júkteledi. Bul bir jaǵynan kásipkerlerdiń múddesine saı keledi. О́ıtkeni olar ózderiniń qosqan úlesiniń naqty nátıjesin kóretin bolady. Halqyna qaıyrymdylyq jasaǵan azamat retinde Sizderdiń de esimderińiz memleket tarapynan eleýsiz qalmaıdy, – dedi Qasym-Jomart Toqaev.
Sonymen qatar Prezıdent eriktilerge zor qurmetpen qaraıtynyn jáne jan-jaqty qoldaý kórsetetinin atap ótip, olarǵa rızashylyq bildirdi.
