– «Keleshek-2024» halyqaralyq týrnırine Qyrǵyzstan, Qazaqstan, О́zbekstan jáne Ázerbaıjannan 600-den asa gımnastshylar qatysty. A tobynda Ázerbaıjan jáne Qyrǵyzstan ulttyq qurama músheleri baq synasty. Mańǵystaýdan barǵan 22 gımnastshy úlken arenada óner kórsetti. Jarys nátıjesi boıynsha sportshylardyń 12-si qola, 13-i kúmis júldeni enshilep, 11-i altyn medalmen marapattaldy. Bul – biz úshin úlken jetistik. Daıyndyqty jalǵastyra beremiz. Mańǵystaý gımnastshylary alda zor jetistikterge jetetinine senim mol, – deıdi oblystyq atalǵan sport túri federasııasynyń basshysy Aıda Sadatqyzy.
Federasııa basshysynyń aıtýynsha, Qazaqstan quramasy sport sheberleri jáne sport sheberine úmitker baǵdarlamasynda óner kórsetken toptar boıynsha jalpy esepte 2-orynǵa ıe bolǵan jáne birqatar mańǵystaýlyq gımnastshylardyń úzdik nátıjeleri úshin Qyrǵyzstan kórkem gımnastıka federasııasy kýbogimen marapattalýy da óńir gımnastıkasynyń búgingi deńgeıin, qarqynyn tanyta túsedi.
Ári óner, ári sport sanalatyn kórkem gımnastıka adam tulǵasynyń qalyptasý, jetilý symbatyna erekshe kúsh beredi. Qıyndyǵy men qyzyǵy qatar júretin jattyǵýǵa qatysýshylar qatarynyń sıremeýi de sol sebepti bolsa kerek.
Mańǵystaý oblysy
