Qostanaıdaǵy gýmanıtarlyq kómek ortalyqtarynyń biri «Áýejaı» shaǵyn aýdanyndaǵy Álıhan Bókeıhan atyndaǵy mekteptiń sport zalyna ornalasqan. Atalǵan ortalyqqa arnaıy baryp qaıttyq. Biz kelgende Ahmet Baıtursynuly atyndaǵy Qostanaı ýnıversıtetiniń oqytýshylary men stýdentteri Almaty menedjment ýnıversıteti jibergen gýmanıtarlyq kómekti túsirip jatty.
«Almatydaǵy áriptesterimiz aldyn ala habarlasyp, kólikti kútip alyp, júkti túsirisip jiberseńizder eken degen soń, volonter stýdenttermen birge osynda kelip qaldyq. 10 tonna júkti «Qazlogıstık» seriktestigi sonaý Almatydan tegin jetkizip berdi. Jartysyn osynda túsiremiz, qalǵanyn Aqtóbege aparyp beredi. Bizge kóbine elektr generatorlary, azyq-túlik, kıim-keshek, rezeńke etik kerek. Bul kelgen gýmanıtarlyq kómek Almaty menedjment ýnıversıtetiniń oqytýshylary men professorlarynyń, jalpy qala, oblys turǵyndarynyń kúshimen jınalǵan. Mysaly, Kegen aýdany suıyq maı jibergen», dedi A.Baıtursynuly ýnıversıteti tarıh kafedrasynyń meńgerýshisi Raýan Baıdaly.
Volonterler júkti túsirip bola bergende Qostanaıǵa kelip jatqan gýmanıtarlyq kómekti qabyldap, ony ári qaraı taratýǵa jaýapty bolyp bekitilgen oblys ákiminiń orynbasary Rınat Muhametqalıev te keldi. Jangeldın aýdanyna elektr generatorlaryn tıep jiberý kerek eken. Rınat Zákıuly ortalyq basshysynyń esebin tyńdap, Torǵaıǵa jiberiletin júktiń kólemin naqtylap bolǵan soń, gýmanıtarlyq kómektiń qalaı taratylyp jatqanyn aıtyp berdi.
«Aldymen sý tasqyny bolǵan aýdandardan ótinim qabyldaımyz. Bizge habarlasyp «ne kerek, qandaı zat ákelgen durys?» dep suraǵan basqa óńirlerge biz aýdandardan túsken suranysqa sáıkes kerek dúnıelerdiń tizimin beremiz. Mysaly, qazir birshama aýylda elektr jaryǵy joq, sondyqtan habarlasqan adamdarǵa bizge avtonomdy generatorlar kerek edi dep jatyrmyz. Kelgen generatorlardy birden jaryqsyz otyrǵan eldi mekenderge jóneltemiz. Qazir ózderińiz kórip turǵan júk kóligi tirkemesine syıǵanynsha Torǵaıǵa 100 shaqty generator alyp ketedi. Jaryqsyz otyrǵan Amangeldi, Jangeldın aýdandary qazir aýyzsý tapshylyǵyn sezinip otyr. Sondyqtan biz kómek kórsetýge nıet bildirgen jergilikti azamattarǵa, ózge óńirlerge taza aýyzsý ákelgenderińiz durys degen tilegimizdi bildirip jatyrmyz. Aýyzsý bizge sonaý Shymkentten de keldi. Jambyl, Shymkent, Almaty, Astana, Qyzylorda sııaqty óz óńirlerimizdiń syrtynda, Qyrǵyzstan, О́zbekstan tárizdi alys-jaqyn shetelden de kómek kelip jatyr. Munyń syrtynda, gýmanıtarlyq kómek ákeldik, biraq halyqqa ózimiz tikeleı taratyp bergimiz keledi dep jatqan aǵaıyn bar. Biz mundaı kisilerdi Arqalyq, Amangeldi, Jangeldın aýdandaryna jiberip jatyrmyz», dedi ákimniń orynbasary.
Ahmet Baıtursynuly atyndaǵy Qostanaı óńirlik ýnıversıteti men Qostanaı aýdanyndaǵy Áljan aýylynda da gýmanıtarlyq kómek taratý beketteri jumys istep jatyr. Bul oryndarǵa kelip túsip jatqan dúnıelerdi suryptap, rettep, ony ári qaraı halyqqa taratý isinde ýnıversıtet oqytýshylary men stýdentterdiń, volonterlerdiń eńbegi zor.
Búginde óńirde oblys ákimdiginiń janynan qurylǵan qoǵamdyq shtabtyń quramyndaǵy máslıhat depýtattary, óńirge belgili azamattar, din qyzmetkerlerinen turatyn 58 adam belsendi jumys istep jatyr. Olar tikushaqpen áli de sý qursaýynda jatqan eldi mekenderdi aralap, turǵyndarmen júzdesip, qaı eldi mekenge ne jetpeı jatqanyn anyqtap, halyqtyń qajetin der kezinde taýyp berýdiń qamymen júr.
«Atalǵan qoǵamdyq shtab ókilderi ózderi barǵan aýyldyń ahýaly týraly maǵan kúndelikti aqparat berip otyrady. Men osy aqparat negizinde jedel kómek uıymdastyryp, shalǵaıdaǵy aýyldyń qajetine jaraıtyn júkti jiberip otyramyn. Mysaly, keshe tańerteń Amangeldi aýdanyndaǵy qoǵamdyq shtab ókilderinen generator jetpeı jatyr degen habar kelip tústi. Biz birden kásipkerlermen sóılesip, kólik taýyp, keshke deıin 100-den asa generator jetkizip berdik», deıdi Rınat Zákıuly.
Qostanaı oblysy
