Bastapqy básekelerde reseılik Veronıka Kýdermetova men ıtalııalyq Iаsmıne Paolınıden basym túsken jerlesimiz jartylaı fınalda Iga Shventekpen sheberlik baıqasty. Búgingi tańda álemniń birinshi raketkasy atanyp otyrǵan 22 jastaǵy Polshanyń maqtanyshy sońǵy úsh-tórt jyl aralyǵynda tolaǵaı tabystarǵa qol jetkizdi. Ol Rolan Garrosty úsh márte utyp, US Open dodasynda daralandy. Aýstralııanyń ashyq birinshiliginde úzdik tórttiktiń qataryna qosylyp, WTA týrnırlerinde 19 ret teńdessiz dep tanyldy. Biraq bul jaǵdaılardyń eshbiri Rybakınaǵa áser etken joq. Úsh settik saıys 6:3, 4:6, 6:3 esebimen qazaqstandyq oıynshynyń paıdasyna sheshildi.
Fınalda Elena álemdik reıtıngte 27-orynǵa turaqtaǵan Marta Kostıýkpen kúsh synasty. Bıyl Aýstralııanyń ashyq birinshiliginiń shırek fınalyna deıin jetken Ýkraına tennısshisi Shtýtgardta TOP-ondyqtyń qataryndaǵy qytaılyq Chjen Sınven (7-oryn), amerıkalyq Korı Gaýff (3-oryn) jáne chehııalyq Marketa Vondroýshova (8-oryn) syndy myqty tennıshilerdi tize búktirip, aıdy aspanǵa bir-aq shyǵardy. Alaıda aqtyq synda Kostıýk otandasymyzǵa jarytyp qarsylyq kórsete almady. Esep – 6:2, 6:2.
Sóıtip, bıyl Elena Rybakına óziniń úshinshi tıtýlyna qol jetkizdi. Buǵan deıin ol Brısben men Ábý-Dabıde uıymdastyrylǵan dúbirli dodalarda aldyna jan salmady. Jasyl qurlyqtaǵy jarystyń sheshýshi tusynda Elena belarýstik Arına Sobolenkoǵa san soqtyrsa, Parsy shyǵanaǵynda reseılik Darıa Kasatkınany qapy qaldyrdy. Sondaı-aq jerlesimiz Doha men Maıamıdegi týrnırlerdiń fınalynda oınady.
