Jaıyq jýası bastady

Oral qalasynyń tusynda Jaıyq ózeniniń deńgeıi qaýipti mejeden 13 sm asyp ketse de, qorǵanys bógenderdiń septigi tıip, shaharǵa sý óte almady. Mamandar ózenniń joǵarǵy bóliginde sý deńgeıi turaqty túrde tómendep jatqanyn aıtady. О́zen deńgeıinen áldeqaıda tómen jat­qan keıbir saıajaı bólikteri de qorǵaýshylardyń arqasynda aman qaldy. Qazir halyq osy nátıjeni saqtap qalý úshin kúresip jatyr.

Sáýir aıynyń basynan beri tótenshe jaǵdaı rejiminde ómir súrip jatqan Batys Qazaqstan oblysynda ómir birte-birte óz qalybyna túsip keledi. Sáýirdiń 15-inen bastap Oral qalasy men Jaıyq jaǵa­laýyn­daǵy 4 aýdan­da mek­teptegi oqý úde­risi qashyq­tan oqy­ty­la bastaǵan edi. 24 sáýir­den bastap qa­­lyp­ty jaǵ­daı­ǵa aýysatyn boldy.

Buǵan deıin tasqynnan zardap shekken turǵyndar da memleketten tıisti járdem alyp, shyǵynnyń ornyn toltyra bastady. Sáýirdiń 22-si kúni Qaratóbe aýdanyna Prezıdent apparaty ishki saıasat bólimi basshysynyń orynbasary Dáýren Babamuratov pen oblystyq Qoǵamdyq damý basqarmasynyń basshysy Gúljanar Shókeeva arnaıy baryp, turǵyndarmen kezdesti. Tasqynnan baspanasy, mal-múlki zardap shekken turǵyn­dar­men osyndaı kezdesý barlyq deń­geıde ótip jatyr. Oral qalasynyń ákimi Mırjan Satqanov keshe saıa­jaı turǵyndarymen kezdesip, shyǵyndy óteý, birjolǵy áleý­mettik kómek berý, nesıe tóleý ýaqytyn shegerý sııaqty ózek­ti máse­lelerge baılanysty saýal­dar­ǵa jaýap berdi.

Batys Qazaqstan oblysy ákimi­niń orynbasary Tilepbergen Kaıýpovtyń aıtýynsha, óńirde zardap shekkenderge 100 AEK kóleminde birjolǵy áleýmettik kómek kidirissiz tólenip jatyr. Búginge deıin 1 490 otbasy 547,3 mln teńge kóleminde kómek alyp úlgergen. Arnaıy komıssııalar 1 150 úıge tehnıkalyq tekserý júrgizip, 397 úıdi turýǵa jaramsyz degen sheshimge kelgen. Iаǵnı Qaratóbe aýdanynda – 98, Syrym aýdanynda – 114, Terekti aýdanynda – 60, Báıterek aýdanynda – 4, Bórli aýdanynda – 121 úı qaıtadan salynady. Bul áli túpkilikti san emes, komıssııa jumysy jalǵasady.

Oral qalasynda 15 evakýasııa­lyq beket daıyndalǵan edi. Sonyń 10-yna adamdar ornalas­ty. Stýdentter onlaın oqýǵa ket­keli 8 jataqhana bosap, úıin sý basqan myńnan asa turǵyn kóp­shi­lik jataqhanaǵa kóshirildi. Sport ǵımaratynda ýaqytsha ornalasqan kópbalaly otbasylar men múmkindigi shekteýli azamattar jergilikti mesenattardyń kómegimen páterge shyǵaryldy. Qazir 2 326 adam evakýasııalyq beketterde jatyr. Jaǵdaı qıyn­daı­tyn bolsa, 2 700 oryn rezervte tur.

Sý basqan saıajaı turǵyn­da­ry­na sý ortasynda qalǵan úılerine kedergisiz kirip shyǵýǵa barynsha jaǵdaı jasaldy. Jalpy, 20 kún ishinde Oral qalasynyń ózinde 45 shaqyrym bóget turǵyzyldy.

Osy kúnderi Qazaqstannyń 11 oblysynan, respýblıkalyq ma­ńyzy bar úsh qaladan Aq­jaıyq óńirine 4 myńdaı adam kómekke keldi. Olar jergilikti qury­lym­darmen tize qosyp qımyl­dap jatyr. Keshe Túrkistan oblysy jáne Qyzylorda oblysy Tótenshe jaǵdaılar departa­men­tiniń qutqarýshylary batys­qa­zaqstandyq áriptesterimen birge Aqjaıyq aýdanyna qarasty Býdarın, Kolovertnoe jáne Jańabulaq aýyly mańynda Jaıyq ózeninen dalaǵa jaıylǵan sý orta­synan shamamen 137 jylqy, onyń ishinde 3 qulyndy aıdap shyǵaryp, ıesine tabys etken. Al saıajaı aýmaǵynan qutqarylǵan ıt pen mysyqtyń sanynda esep joq.

Sý tasqyny talaı jurtty ábigerge salyp, biraz materıaldyq shyǵynǵa ushyratqanymen, ha­lyqtyń birligin nyǵaıtyp, ynty­maǵyn kúsheıtken kezeń boldy.  Bul kúnder de tarıh qazynasyna aınalǵan sátte Jaıyq boıyndaǵy halyq erliginiń jylnamasy jazylatyn shyǵar.

Batys Qazaqstan oblysy