Oblys ortalyǵyn qaq jaryp ótetin Qylshaqty ózeni jaǵalaýyndaǵy ondaǵan úıdi sý shaıyp ketken edi. Eski úıler tabıǵattyń synaǵyna tótep bere almaı, turǵyndary alǵashqy bette abdyrap qalǵany da ras. Búgin olar úshin aq túıeniń qarny jarylǵan tamasha oqıǵa boldy. 8 otbasy páter kiltin aldy. Bir aıta keterligi, zardap shekkender baspanalaryn qalanyń ár aýdanynan ózderi tańdady.
– Biz osyndaı qysyltaıań kezde máseleni tezdetip sheshýdemiz. Jergilikti bıýdjettiń esebinen 11 otbasyna páter berildi. Aqkól, Arshaly, Ereımentaý, Jaqsy, Zerendi, Selınograd aýdandarynyń 74 otbasyna turǵyn úılerin jóndeýge kómek kórsetiledi. Barlyq zardap shegýshige 100 aılyq eseptik kórsetkish kóleminde qarjylaı demeý jasalady. Adamdardyń kóńil kúıin jaqsy túsinip otyrmyz. Apat kezinde qaýiptiń betin qaıtarýǵa atsalysqan adamdarǵa alǵysymdy bildiremin. Eń aldymen eldiń birligin kórdik. Qala turǵyndary da, eriktiler de kómektesti, – dedi oblys ákimi Marat Ahmetjanov saltanatty rásim kezinde.
Páter kiltine ıe bolǵandardyń da qýanyshy kól-kósir. Olar biraýyzdan Prezıdent Qasym-Jomart Toqaevqa, Úkimet pen oblys basshylaryna alǵystaryn jaýdyrdy.
– Kóne bolsa da osy shańyraqtan ul-qyzymyzdy ósirip, qutty mekenimizge aınalǵan bosaǵamyz ǵoı. Qyzyl sýdyń qursaýynda qalyp, qabyrǵasy qaqyraǵanda ókindik te, ıyǵymyzǵa túsken júkti birlese kóterisken elimnen aınalaıyn, – deıdi qala turǵyny Ashat Bilálov.
Páter kiltin alǵan adamdardyń eski úıleri birden buzylyp, oryndary tazartylyp jatyr. Aldaǵy ýaqytta bosaǵan jer telimderine kópqabatty turǵyn úıler salynýy múmkin. Áıteýir, kádege asatyny anyq.
Kókshetaý
