23 sáýirde Kóksý aýdanynyń polısııa bólimine ulynyń joǵalǵany týraly aryzben Eńbekshiqazaq aýylynyń turǵyny júgindi. Onyń aıtýynsha, 29 jastaǵy jigit mal jaıýǵa shyǵyp, oralmaǵan. Joǵalǵan adamdy izdeýge aýdandyq polısııanyń barlyq jeke quramy, jergilikti turǵyndar men eriktiler baǵyttaldy.
«Sol kúni joǵalǵan jigittiń jylqysy Eskeldi aýdanynyń Jańalyq aýylynda tabyldy. Kórshi aýyldardy Kóksý ózeni bólip turǵany eskerilip, izdeýge oblys qutqarýshylary qosyldy. 27 sáýirde izdeý is-sharalarynyń barysynda joǵalǵan adamnyń zorlyq-zombylyq belgilerinsiz máıiti Kóksý ózeniniń túbinde tabyldy. Qazirgi ýaqytta qajetti saraptamalar taǵaıyndaldy», – dedi PD bastyǵynyń orynbasary Eldar Abdıkenov.
О́ńir polısııasy aýyl turǵyndaryna múmkindiginshe saq jáne sergek bolýdy suraıdy.
«Sý tasqyny kezeńinde sý obektilerindegi sý kóleminiń ulǵaıýy baıqalatynyn jáne ondaǵy aǵynnyń jyldamdyǵy qatty bolýy múmkin ekenin umytpańyz. Jergilikti turǵyndar men eriktilerge quqyq qorǵaý organdaryna zor kómek kórsetkeni úshin alǵys aıtamyz», – delingen habarlamada.
