Aǵash egýge oblys ákimi Ermaǵanbet Bólekpaev ta qatysty.
«Prezıdenttiń bastamasymen elimizde «Taza Qazaqstan» ekologııalyq aksııasy bastaldy. Bul bir kúndik aksııa emes, ol uzaq merzimge sozylmaq. Oblysymyzdyń turǵyndary aýmaqtardy tazalaýǵa, kógaldandyrýǵa belsendi qatysyp jatyr. Aımaqtaǵy barlyq aýdan men qalada aǵash egilip jatyr. Bul jumys áli de jalǵasady. Tek Qaraǵandy boıynsha 90 myńnan astam aǵash egiledi. Kırzavod aýdanynda orman alqabyn qalpyna keltirý josparlanǵan. Belsendilik tanytqandaryńyz úshin rahmet», dep óńir basshysy turǵyndarǵa alǵysyn bildirdi.
Igi iske Álıhan Bókeıhan aýdany mektepteriniń dırektorlary da óz úlesin qosty.
«Kóktemniń bastalýymen bizde qala men oblys boıynsha árdaıym senbilikter ótedi. Biz bul is-sharalardan shette qalmaımyz. Búgin biz dırektorlar korpýsymen saıabaqta aǵash egemiz, al ata-analar qaýymy, muǵalimder men oqýshylar mektep aýmaǵyn kógaldandyrýmen aınalysady. Barlyq aǵash tamyr jaıyp, qalamyzdyń turǵyndaryn qýantady dep úmittenemiz», dedi №85 mektep dırektory Saltanat Tursynova.
Úlkendermen birge balalar da aǵash ekti.
«Men bizdiń saıabaqtyń taza, jaqsy jáne ádemi bolǵanyn qalaımyn. Aǵammen birge keldim. Úlkenderge kómektestim, kóshetter ekken shuńqyrlarǵa topyraq salyp otyrdym. О́zim bir aǵash ektim. Endi saıabaqqa jıi baryp, onyń qalaı ósip jatqanyn baqylap turamyn», deıdi 7 jastaǵy Arsenıı Obert.
Osy jyldyń kókteminde Álıhan Bókeıhan aýdanyna 10 myńnan astam túrli aǵash egiledi.
Sondaı-aq Qaraǵandyda áýejaı aýdanynda 1 000 terek egildi.
Aksııaǵa 300-den astam adam – ákimdik ókilderi, depýtattar, ekologııalyq qozǵalys eriktileri, Qaraǵandy ýnıversıtetiniń stýdentteri, Qaraǵandy akademııasynyń kýrsanttary qatysty.
Aǵash egý naýqany «Taza Qazaqstan» respýblıkalyq ekologııalyq aksııasy aıasynda ótti. Aldaǵy ýaqytta kóshetterge kútim jasalady.
Qaraǵandy oblysy
