Foto: primeminister.kz
Úkimetke Batys Qazaqstan oblysynda júrgizilgen jumysty Atyraýda da jan-jaqty uıymdastyrý tapsyryldy, onda sý tasqynyna qarsy aldyn alý is-sharalaryn, jetkizilgen ınjenerlik tehnıkalardy eskere otyryp, 14 óńirden jumyldyrylǵan áskerı qyzmetshiler men qutqarýshylar aýqymdy shyǵynǵa jol bermeı, sý tasqynyn eńserýge múmkindik bergen edi.
BQO-daǵy jumysqa 11 myńnan astam adam men 2 myńǵa jýyq tehnıka tartylyp, uzyndyǵy shamamen 150 km bolatyn qorǵanys bógetteri salyndy, 1,3 mln qum toltyrylǵan qapshyq tóseldi.
Oral qalasynda 18 turǵyn úı alabyn boılaı turǵyzylǵan bógetter qaýipsizdikti tolyq qamtamasyz etip, qalanyń turǵyn úıleri men áleýmettik nysandaryna sý jetken joq. Sý basqan baý-baqsha seriktestikteri men Jaıyq ózeni alqabynda ornalasqan birqatar úıdiń turǵyndary aldyn ala qaýipsiz jerge kóshirilgeni málim.
Batys Qazaqstan oblysy ákimdiginiń málimetinshe, búginde 909 úıdiń turǵyndary óz úılerine qaıta oraldy. 5 myńnan astam mal basy qaýipsiz jerlerge aıdalǵan.
Búgingi tańda oblystyq jedel shtab pen sý tasqyny saldaryn joıý jónindegi komıssııa 8 myńǵa jýyq ótinim jınap, myńnan astam úıge baǵalaý jumystaryn júrgizgen. 1672 otbasy 100 AEK mólsherinde birjolǵy tólem aldy. Zardap shekkenderge kómek kórsetý jumystary jalǵasyp jatyr.
«Sý tasqyny jaǵdaıy turaqtalyp keledi. Batys Qazaqstan oblysynda sý tasqynynyń sharyqtaý shegi bolyp ótti. Munda jumysqa tartylǵan barlyq bólimshelerdiń úılesimdi jumysyn atap ótken jón. Birlesken is-áreketterdiń arqasynda 84 eldi mekendi sý basýǵa jol berilmedi, sondaı-aq óńirdegi sý tasqyny saldary barynsha azaıtyldy. Qazir úılerdi qaıtadan sý basý qaýpi seıildi», degen Oljas Bektenov Tótenshe jaǵdaılar, Qorǵanys, Ishki ister mınıstrlikteri men Ulttyq qaýipsizdik komıtetiniń jáne jergilikti atqarýshy organdardyń, uıymdardyń barlyq qyzmetkerleri men áskerı qyzmetshilerine, eriktilerge, tasqynǵa qarsy sharalarǵa qatysqan barlyq janashyr azamattarǵa alǵysyn bildirdi.
Búgingi kúnniń basty mindeti — Atyraý oblysyn sý tasqynynan qorǵanýǵa daıyndaý. Kún saıyn Jaıyq ózeniniń sý deńgeıi kóterilip keledi. Qaýipti belgige deıin shamamen 100 sm qaldy.
«Qazir úlken sý kólemi Atyraý oblysyna qaraı aǵyp jatyr, aldaǵy kúnderi sharyqtaý shegi kútilip otyr. Barlyq kúshterdi jumyldyryp, basqa óńirlerden qosymsha kúsh tartqan Batys Qazaqstan oblysynyń tájirıbesin paıdalanǵan jón. Sý deńgeıiniń saǵattyq monıtorıngin qamtamasyz etip, qorǵanys bógetteriniń uzyndyǵy men bıiktigin ulǵaıtý qajet. Biz óńirdi qorǵap, sý tasqynyna jol bermeýimiz kerek», dep atap ótti Úkimet basshysy.
Búginde Atyraý oblysynda apattyq-qutqarý jumystaryn júrgizý úshin 13 myńnan astam adam jáne 1 200-den astam tehnıka jumyldyrylǵan. О́ńirde 500 km-den astam bóget salyndy, onyń ishinde Atyraý qalasyndaǵy turǵyn alaptardyń boıynda – 242 km, 4,8 mln-nan astam qapshyqtar paıdalanyldy. О́zen saǵasynda, Kaspıı teńizinde tereńdetý jumystary jalǵasyp jatyr: 1 408 m qazylyp, 11 538 m3 topyraq alyp tastaldy.
Qorytyndylaı kele, Úkimet basshysy negizinen el boıynsha sý tasqyny qaýpi seıilgenin atap ótti.
«Prezıdent tabıǵı apattan qıraǵan úılerdi qalpyna keltirý, zardap shekken azamattardy qalypty ómirge qaıtarý boıynsha basym mindet qoıdy. Biz barlyq kúsh-jigerimizdi áleýmettik nysandardy, turǵyn úıler men ınfraqurylymdy salýǵa jáne jóndeýge, adamdarǵa ótemaqy tóleýge baǵyttaýymyz kerek. Barlyq atqarylatyn sharalar naqty ári úılesimdi túrde jasalýy kerek. Ákimdikter turaqty túsindirý jumystaryn júrgizip, zardap shekken turǵyndarmen kezdesýi kerek», dep qorytyndylady Premer-mınıstr.
