Balqashtan joldaǵan gýmanıtarlyq kómekte azyq-túlikter, kúrek, qajetti qural-saımandar, kilem, tósek-oryndar men jeke gıgıenalyq zattar, ózge de qajetti zattar qamtylǵan.
– Biz baspanasynan aıyrylyp, kóńiline qaıaý túsken buqaranyń jaǵdaıymen tanyspyz. Qazir kóptegen óńirde sý tasqyny júrip, adamdar zardap shegip jatyr. Osyny estip, kórip otyrǵan Balqash kóli jaǵasyn jaılaǵan Shashýbaı, Aqjaıdaq, Deresin sııaqty aýyldardyń halqy únsiz qalmady. Men bastama kótergen kúnnen jergilikti belsendi Ǵabıt, Qurmash, qaladaǵy júk tasymalymen aınalysatyn «Gazel» kóligin júrgizetin jigitter qoldaý tanytyp, qarajat jınaýdy bastady. Halyqtan 5 mln teńge qarjy jınaldy. 4 mln teńgege kerek zattar alyndy. 1 mln teńge jol shyǵynyna qarastyryldy. Balqash qalasynyń ákimdigi de jol shyǵynyna 1 mln teńge qarjy bóldi. Basty maqsatymyz – halyqtyń amanatyn Qulsaryǵa jetkizý, – deıdi belsendi toptyń jetekshisi Birjan Maqsut.
Qoǵam belsendisi Ǵabıt Jaqypov qutqarýshylarǵa úrmeli qaıyq, sýda kıetin etik pen arnaıy kıimder, sý sorǵyzatyn qurylǵylar, bóget jasaýǵa arnalǵan qaptardy kóptep alǵandaryn jetkizdi.
– Qulsarydaǵy zardap shekken halyqqa kómek retinde alty «Gazel» júkti aman-esen jetkizip berdik. Osy oraıda barlyq janashyr turǵynǵa alǵysymdy bildirgim keledi. Qala ákimi Sapar Sataev bastaǵan qala ákimdiginiń mamandaryna, qaıyrymdylyq ispen aınalysyp júretin Anar Adambekovaǵa, kásipkerlerge, qolushyn bergen ózge de etnos ókilderine, tipti ıgi isten qalys qalmaǵan stýdent jastarǵa dán rızamyn. Birjan Maqsut esimdi jaqsylyqqa jarshy bolǵan baýyrymyzǵa, ony qoldaǵan barsha azamatqa rızashylyǵymyz sheksiz. Erbol, Ǵazız, Qurmash, Amandyq esimdi arda azamattar qurbandyq shalyp, eldiń amandyǵyn tilep, quran oqytyp, Qulsaryǵa jolǵa shyǵatyn adamdarǵa as berdi. Jaqsylyq jasap jarysqan jurtty kórgende, birligimizdiń bekem ekenine kózimiz jetti. Qulsarydaǵy el-jurtqa barynsha basý aıtyp, birge ekenimizdi jetkizdik. Olar da alǵysyn jaýdyryp jatyr, – deıdi Ǵabıt Jaqyp.
Balqash qalasynan Qulsaryǵa baǵyt alǵan qaıyrymdylyq kerýenine turǵyndar áli de qarjy aýdaryp jatyr. Balqash óńiriniń janashyr azamattary men eriktileri túsken qarjyny arnaıy ashylǵan esepshottarǵa aýdarady.
Balqash qalasy
