Kópbalaly ana Mádına Ábilǵazıevany osydan eki-úsh jyl buryn Qyzyljuldyz aýlynyń turǵyndary bala sany tolmaı jatqan jergilikti mektepti saqtap qalý úshin arnaıy shaqyrtyp alǵan. Bolashaǵy bulyńǵyrlaý bolyp, jabylyp qalaıyn dep turǵan bilim oshaǵyna Mádınanyń ózi muǵalim, joldasy ot jaǵýshy bolyp ornalasady. Buǵan qosa tórt balasy birdeı osy mekteptiń oqýshysy atanyp, sırep qalǵan balalardyń qataryn kóbeıtedi. Jańa orynǵa birjola turaqtap qalýdy uıǵarǵan kópbalaly otbasy aýyldyń baıyrǵy turǵynynan 300 myń teńgege úı satyp alady. Biraq ony zańdastyrmaǵan. Sol úıi sýǵa ketken Mádına amalsyz Arqalyq qalasyndaǵy qoǵamdyq shtabqa kelip júginedi. Shtab atqaryp jatqan san-salaly jumystyń bir baǵyty da osy: Mádına sekildi ne úıi, ne qujaty joq turǵyndardyń qamymen zańgerlermen, qaıyrymdy kásipkerlermen sóılesip, muqtaj bolyp qalǵan otbasylardy tyǵyryqtan shyǵaratyn jol izdeıdi.
Nemis ulttyq ortalyǵynyń basshysy, kásipker Sergeı Blok ta Mádınanyń otbasyndaǵy jaǵdaıdy óńirlik shtab arqyly estip bilgen. Atymtaı jomart kásipker kóp oılanbastan kópbalaly otbasymen kezdesip, Arqalyq qalasynan úsh bólmeli jaıly páter satyp áperdi.
«Jaǵdaıymyzdy aıtyp, aldaryna barǵanda meselimizdi qaıtarmaǵan, jan-jaqty naqty kómek berip jatqan oblys, qala basshylyǵyna, qaıyrymyn tıgizip, osyndaı keń úıdi alyp berip jatqan Sergeı Ivanovıchke zor alǵysymdy bildiremin», deıdi bes balanyń anasy M.Ábilǵazıeva.
Qostanaı oblysy
