Foto: gov.kz
«Bıylǵy sý tasqyny Qazaqstan táýelsizdik alǵaly onynshy iri sý tasqynyna jatady. Alaıda osy kezge deıin sý tasqynynyń aldyn almaǵany nemese salǵyrttyq tanytyp, jol bergeni úshin eshbir joǵary laýazymdy tulǵa jaýapkershilikke tartylmaǵan. Bul jerde men jergilikti atqarýshy organnyń, ıaǵnı ákimderdiń jaýapkershiligi týraly aıtyp otyrmyn. Nege jergilikti atqarýshy organ? О́ıtkeni ózen boıyndaǵy sý jaıylmalarynan jer bergen, saıajaılardy is júzinde turǵyn úıge aınaldyrǵan, ıaǵnı jaryq, gaz tartyp, azamattardy turaqty tirkeýge ruqsat bergen, ol Úkimet emes, basqa emes, jergilikti atqarýshy organ, ıaǵnı ákimdikter. Al keltirilgen shyǵyndardy óteý salmaǵy árkez memleket moınyna artylady», dedi Abzal Quspan.
Májilismen sý tasqynyna baılanysty mamandardyń boljamyn elemegen jergilikti atqarýshy organdar tasqyn taqaǵanda dúrbeleńge salynǵanyn aıtty. Depýtat kinálilerdi jazaǵa tartýdy usyndy.
«Ábden taqaǵanda jergilikti atqarýshy organ dúrbeleńge salynyp, búkil eldi dúrliktirip, jan-jaqtan tehnıka men eriktilerdi aldyrtty, sý deńgeıi 10 metrden asyp ketedi dep bógetter turǵyzdy. Adamdardy shuǵyl evakýasııalady, Qazaqstandy aıtpaǵanda shetelden gýmanıtarlyq kómekter aldyrdy. Nátıjesinde kelgen sýdyń maksımaldy deńgeıi 8 metr 64 sm quraǵanyn kórip otyrmyz. Bul salǵyrttyqqa jáne kelgen shyǵyndar úshin jaýapty sheneýnikter zań aldynda jaýap berýge tıis», dedi depýtat.
Halyq qalaýlysy Oral da 2011 jyly sýǵa ketse de taǵy sol aýmaqtan ýchaske berilgenin synady.
«Tolyqtaı sýǵa ketken «Nurly jer» aýdanynyń shemasy óte qarabaıyr, biraq ol ondaǵan jyldar boıy esh kedergisiz jumys jasap jatyr, ákimdikke jaqyn pysyqtar men pysyqaılar gektarlap tegin jer alyp alady da, qara halyqqa on sotyqtan bólip satady, boldy. Nátıjesinde, jergilikti ákimdik qyzmetkerleri sol jerdi bólý men berýdiń «qyzyǵyn» kóredi, qarapaıym halyq zardabyn tartady, al barlyq shyǵyndy memleket óz moınyna alady. Otyz jylǵy eski shema qashanǵy jalǵasa bermek?!», dedi Májilis depýtaty Abzal Quspan.
