Jalpyulttyq «Biz birgemiz!» telemarafony: Respýblıkalyq 10 telearna 5 saǵat boıy úzdiksiz habar taratty

Telemarafon barysynda «Qazaqstan», «Habar», «Jibek Joly», «Eýrazııa», «KTK», «31 arna», «Atameken Business», «Astana TV», «7 ar­na» jáne «Almaty TV» telearnalarynyń efı­­­rin­de ortalyq jáne jergilikti bılik ókil­­­deri, depýtattar tasqynnyń saldary men mem­le­ket tarapynan qabyldanyp jatqan sharalar týraly jan-jaqty áńgimeledi.

Telamarafonǵa tasqynnyń zardabyn joıýǵa jaýapty birqatar vedomstvo jetekshileri: Tótenshe jaǵdaılar mınıstri Shyńǵys Árinov, Densaýlyq saqtaý mınıstri Aqmaral Álnazarova, Qarjy mınıstri Mádı Takıev, О́nerkásip jáne qurylys mınıstri Qanat Sharlapaev, Qorǵanys mınıstrliginiń resmı ókili Rýslan Jangýlın, Sý resýrstary jáne ırrıgasııa mınıstriniń birinshi orynbasary Bolat Beknııaz, Oqý-aǵartý vıse-mınıstri Edil Ospanov, Parlament depýtattary, Qazaqstan halqy Assambleıasynyń ókilderi men eriktiler qatysty.

Tótenshe jaǵdaılar mınıstri Sh.Árinovtiń aıtýynsha, búginge deıin sý tasqyny bolǵan aımaqtardan 119 myń adam tolyq evakýasııalandy. Onyń 45 myńǵa jýyǵy – bala. Tótenshe oqıǵa bastalǵaly tasqyn bolǵan aımaqtarǵa kómekke Qarýly kúshterden 5 400-den asa jaýynger, 230 tehnıka, 12 tikushaq, 5 áskerı ushaq jumyldyryldy.

Telemarafon barysynda О́nerkásip jáne qurylys mınıstrliginiń Qurylys jáne turǵyn úı-kommýnaldyq sharýashy­lyq isteri komıteti tóraǵasynyń orynbasary Qanat Myńbaev: «Jer úıleri sýǵa ketken azamattardyń baspana qurylysy 1 maýsymda bastalyp, kelesi jylytý maý­symyna deıin jalǵasady nemese zardap shekkenderge baǵasy 22 mln-nan aspaıtyn daıyn páterler usynylady», dep málimdedi.

Búginge deıin tasqyn zardaptaryn joıýǵa mesenattar men iri kompanııalardan 200 mıllıard teńgege jýyq qarajat jınalǵan. Bul qarajat mektepter men úıler, balabaqshalar men jol salýǵa jumsalady.

«Biz birgemiz!» telemarafony barysynda sý tasqynynyń aldyn alý bo­ıynsha Sý resýrstary jáne ırrıgasııa mınıstriniń birinshi orynbasary Bolat Beknııaz suhbat berdi: «Qazir elimizdegi barlyq sý qoımasy tolyp tur. Jalpy, 2030 jylǵa deıin Batys Qazaqstan (2), Aqtóbe (4), Qyzylorda (1), Túrkistan (3), Jambyl (3), Almaty (1), Shyǵys Qazaqstan (2), Abaı (1), Qaraǵandy (2), Aqmola (1) oblystarynda jalpy sany 20 kólemdi sý qoımasyn salý josparlandy», dedi mınıstrlik ókili.

Telemarafonda tasqyn sýdyń aldyn alýǵa jáne zardabyn joıýǵa jumylǵan kúshtik qurylymdarynyń jumysy men qıyn sátte bir-birine qolushyn soza bilgen qarapaıym el turǵyndarynyń qaıyrymdy áreketteri týraly jan-jaqty kórsetildi. Qolaısyz aýa ra­ıyna qaramastan 280 adamdy ushaqpen evakýasııalaǵan áskerı ushqysh Bıbarys Ibraevtyń, qaıyqpen 200 adamdy qutqarǵan aqtóbelik qutqarýshy Ersaıyn Nurjanovtyń, Petropavldaǵy tasqyn sýdan zardap shekken turǵyndardy tegin tasyǵan júrgizýshiler, Oral qalasynyń shetindegi saıajaılarǵa sý jaıylyp, úılerinde qalyp qoıǵan turǵyndardy qutqarǵan serjanttar, mektep múlkin sýdan aman alyp qalý úshin kúresken Qostanaı oblysyna qarasty Altynsarın aýylynyń muǵalimderi, myńnan asa volonterdiń basyn qosqan «Júrekten – júrekke!» volonterlik klýbynyń múshesi Álisher Sadyqtyń oqıǵalary baıandaldy.

Qoǵamdyq shtab ókili Ásker Pırıev tasqyn kezinde Qazaqstan halqy Assam­bleıa­­­­sy atynan 12 myńǵa jýyq erik­ti qyzmet etkeni, «Júrekten – júrek­ke!» aksııasy aıasynda 800 mıllıon teń­ge­ge gýmanıtarlyq kómek kórsetilgeni jóninde áńgimeledi.

Densaýlyq saqtaý mınıstri Aqmaral Álnazarova telemarafonda: «Sý tasqyny úılermen qosa máıitterdi, janýarlar kómilgen shuńqyrlardy shaıyp ketip, qaýipti indet taralyp ketý qaýpi boldy. Soǵan oraı biz bas sanıtarlyq dárigerdiń qaýlysyna sáıkes tıisti jumys júrgizip, sýdyń synamasyn alyp otyrmyz. Búginge deıin 6 myń nysan dezınfeksııalandy. Barlyq aımaqta dezınfeksııalaý sharasy áli de júrip jatyr. Maskalyq rejim engizilmeıdi», dep atap ótti.

Telemarafon barysynda 10 arnanyń tikeleı efırinde 48 spıker tikeleı efırge shyqty. Telemarafondy 10 arnadan 21 telejúrgizýshi júrgizdi. Telemarafonnyń negizgi uıymdastyrýshysy – «Qazaqstan» teleradıokorporasııasy.

Korporasııa basshysy Lázzat Tanysbaı: «Qıyn kezeńde bárimizge kúr­deli sheshimder qabyldaýǵa týra keledi. Otandyq televızııa tarıhynda formaty men aýqymy jaǵynan mundaı marafon tuńǵysh ret ótip otyr. Jekemenshik jáne memlekettik arnalar birigip 5 saǵattyq efır uıymdastyrdy. Bul jerde halyqtyń aýyzbirligimen qosa, elimizdegi telearna mamandarynyń yntymaǵy da aıqyn kórindi», dep atap ótti.

«Tehnıkalyq múmkindikterimizdiń ártúrli bolýyna qaramastan birtutas efır shyǵardyq. Telemarafonǵa salalyq arna retinde atsalysyp, kórermenge bıznes sektorlarynyń qıyn sáttegi qoldaýy týraly jetkizdik», dedi «Atameken Business» telearnasynyń bas dırektory Qanat Saharııa.

«Telemarafon teleındýstrııanyń asa yqpaldy biriktirýshi kúshin taǵy bir márte pash etti. Otandyq telearnalardyń shyǵarmashylyq toby televızııanyń ındýstrııa retinde halyqty jumyldyra, qıyn sátterde biriktire alatyn zor áleýetin kórsetti. Birligimiz kúshti bol­ǵanda ǵana memleket, qoǵam bolyp kez kelgen qıyndyqty eńseremiz. Telemarafon aýdıtorııaǵa osy birlik pen tutastyqty sezinýge múmkindik berdi», dedi «KTK» telearnasynyń bas dırektory Elmıra Djamılova.

«Sý tasqynynyń zardaptaryn joıýǵa barlyq otandasymyz úles qosty. Onyń ishinde buqaralyq aqparat quraldary da shet qalǵan joq. Tótenshe jaǵdaı bastalǵaly berilip jatqan úzdiksiz tikeleı efırler Birlik kúni qarsańynda aýqymdy telemarafonmen qorytyndylandy», dedi «Almaty TV»telearnasy bas dırektory Tımýr Bazarbaev.

Is-sharanyń onlaın translıasııasy 10 telearnanyń efırinde, resmı saıttarynda, Facebook jáne YouTube jelilerinde, sondaı-aq http://t.me/bizbirgemiz_marathon telegram-arnasynda júrgizildi.