Sýretti túsirgen – Erlan OMAR, «EQ»
Oqý-aǵartý mınıstri Ǵanı Beısembaev elimizdegi barlyq pedagogke «Sońǵy qońyraý» is-sharasyn 25 mamyrda ótkizýdi tapsyrdy. Osyǵan qatysty mınıstr: «Bıylǵy oqý jyly 25 mamyrda aıaqtalatynyn qatań eskertemin. Osyǵan oraı, oqý baǵdarlamalaryn jyl boıyna tabysty meńgergen 3,8 mıllıonnan asa elimizdiń oqýshylary, kelesi synyptarǵa kóshirilsin. Mekteptiń 1-10 synyp oqýshylaryna «Bilimim Otanyma» taqyrybyndaǵy Biryńǵaı synyp saǵattaryn ótkizý 24 mamyr juma kúnine josparlansyn. Bul byltyrǵy qyrkúıek aıynda engizilgen «Birtutas tárbıe baǵdarlamasy» sheńberinde qabyldanǵan josparǵa sáıkes uıymdastyrylýǵa tıis. Áriptesterimizdiń usynysy boıynsha elimizde mamyr aıynda «Yntymaq aıy» aılyǵyn ótkizý josparlanǵan. Onyń aıasynda «Taza Qazaqstan», «Igi ister», «Kanıkýlda kitap oqıyq» jáne t.b. is-sharalar qarastyrylǵan. Sonymen qatar elimizdegi 186 myń mektep bitirýshileri úshin oqý jylynyń aıaqtalýyna arnalǵan «Sońǵy qońyraý» is-sharasyn 25 mamyrda ótkizýdi tapsyramyn», dedi.
Mınıstrdiń aıtýynsha, bıylǵy mektep túlekteri atalǵan is-sharany joǵary mádenıetpen, ysyrapsyz, dańǵazasyz, rýhanı-adamgershilik deńgeıinde ótkizgeni oryndy. Bul bolashaq túlekter úshin ónegeli dástúrge aınalǵan jańa formattaǵy joǵary mádenıetti alǵashqy shara bolary sózsiz. Oqý jylyn aıaqtaýdy sapaly uıymdastyrý jáne qaýipsizdik sharalaryn saqtaý boıynsha óńirlik bilim basqarmalarynyń basshylaryna derbes jaýapkershilik júkteledi.
«Qurmetti áriptester! Tótenshe jaǵdaılar kezinde evakýasııalyq pýnktterde balalar men turǵyndarǵa psıhologııalyq kómek kórsetken 400-den asa mektep psıhologterimen, óz mindetterin atqara júrip, kez kelgen qıyndyqty elmen birge eńserýge qatysqan 29 myńnan asa pedagogter men bilim salasy qyzmetkerleriniń ólsheýsiz eńbekterin erekshe atap ótkim keledi. Máselen, Mańǵystaý oblysynyń pedagogteri Atyraý oblysynan kelgen otbasylardy óz úılerinde qabyldap, uıymshyldyqtyń erekshe úlgisin kórsetti. Aqmola oblysyndaǵy áriptesterimiz arnaıy mektep ınternatynyń tárbıelenýshilerin óz úılerine ornalastyryp, qamqorlyqqa aldy. Ásirese Qostanaı oblysy, Altynsarın aýylynda ornalasqan mektep ujymy eldi mekenge qarǵyn sý kirgen shaqta, eń aldymen, mektepti qorǵap qaldy. Pedagogterimizdiń bul qaraketi – úlken erlik pen shynaıy azamattyqtyń belgisi. «Bereke – birlikte, yrys – yntymaqta» degen. Elimizdiń bilim berý júıesinde ózderińizdeı jaýapkershiligi joǵary, bilikti mamandardyń bolǵanyn maqtan tutamyn, ári barshańyzǵa mınıstrlik pen jeke óz atymnan erekshe rızashylyǵymdy bildiremin», dedi Ǵ.Beısembaev.
