Halyqaralyq bilim berý jónindegi amerıkalyq keńesterdiń «Flagman» baǵdarlamasy, ulttyq ýnıversıtettiń Túrkologııa jáne altaıstıka ǵylymı-zertteý ınstıtýty, Shetel fılologııasy jáne aýdarma kafedrasy birlesip uıymdastyrǵan konferensııa jumysyna AQSh jáne Qazaqstan dıplomattary, Halyqaralyq bilim berý jónindegi amerıkalyq keńesterdiń (ACCELS) basshylary, «Flagman» baǵdarlamasynyń oqytýshylary, Qazaqstan, QHR, AQSh, Qyrǵyzstan ýnıversıtetteriniń shet tili retinde qazaq jáne orys tilderin oqytatyn mamandar, sondaı-aq «Flagman» baǵdarlamasynyń stýdentteri men QazUÝ doktoranttary qatysty.
QazUÝ-dyń Basqarma múshesi – operasııalyq qyzmet jónindegi prorektory Erkin Dúısenov halyqaralyq konferensııa Qazaqstannyń mýltılıngvaldy jáne mýltımádenıet ortasy jaǵdaıynda tildik daıarlyqtyń zamanaýı transformasııalyq modelin tanymal etýge baǵyttalǵanyn atap ótti. Ál-Farabı atyndaǵy QazUÝ men Halyqaralyq bilim berý jónindegi amerıkalyq keńester (ACCELS, AQSh) arasyndaǵy yntymaqtastyq týraly ekijaqty kelisimge 2014 jyly qol qoıylǵan bolatyn. Qujat Qazaqstan men AQSh arasyndaǵy bilim men ǵylymdaǵy ekijaqty gýmanıtarlyq qatynastardy odan ári damytý qajettiligin teń quqyly áriptestik yntymaqtastyqqa jáne tanýǵa negizdelgen.
10 jyl ishinde «Flagman» baǵdarlamasy boıynsha (Russian Overseas Flagship) ýnıversıtette AQSh-tyń túrli joǵary oqý oryndarynan 200-den astam stýdent bilim aldy. Byltyr shilde aıynda QazUÝ alǵash ret ár shtattan kelgen 15 amerıkalyq orys tiliniń mamanyna – mektep muǵalimderi men ýnıversıtet professorlaryna biliktilikti arttyrý kýrstaryn ótkizdi. Sonymen qatar byltyr AKSELS jáne QazUÝ professorlary qatysatyn birlesken halyqaralyq joba bastalǵan edi.
Konferensııa barysynda Qazaqstandaǵy AQSh elshiliginiń bas konsýly Erkin Mıshel, Almaty qalasyndaǵy QR SIM ókildigi basshysynyń orynbasary Islambek Raıymov, Strategııalyq tilder, mádenıetter jáne óńirler (AQSh) boıynsha bilim berý baǵdarlamalary departamenti dırektorynyń orynbasary Ketrın Keshner jáne «Flagman» baǵdarlamasynyń stýdenti Hloıa Edjıngton quttyqtaý sóz sóıledi.
QazUÝ professory Eleonora Súleımenova «Flagman» baǵdarlamasynyń tájirıbesi: Qazaqstannyń mýltımádenıetti jáne mýltılıngvaldy ortasynda tilderdi oqytý» týraly baıandama jasap, O.Altynbekova, L.Ekshembeeva, Z.Sábıtovamen birlesip jazǵan «Qazirgi orys tiliniń morfologııasy» oqýlyǵyn tanystyrdy.
Plenarlyq otyrys kezinde Ál-Farabı atyndaǵy QazUÝ-dyń qurmetti doktory, professor Den Devıdson (AQSh) «Sońǵy 10 jyldaǵy testilik derekter nátıjeleri boıynsha «Flagman» baǵdarlamasynyń transformatıvti oqytýy» jaıly baıandamasyn jasap, Martın S.Sıntııa (AQSh) «Flagman» baǵdarlamasynda bolashaq kásibı sheteldik mamandardyń quzyrettilik biliktiligin baǵalaýǵa qatysty sheberlik saǵatyn ótkizdi. Shara sońynda qatysýshylar óz oılaryn bólisip, pikir almasty.
ALMATY
