Qazaq KSR Oqý-aǵartý mınıstrliginiń 1984 jylǵy 29 mamyrdaǵy №115-158 buıryǵynyń negizinde, Shymkent oblystyq atqarý komıtetiniń sol jylǵy 5 shildedegi buıryǵymen «Respýblıkalyq orys tilin tereńdetip oqytý jáne áskerı kásipke baǵyttalǵan mamandandyrylǵan mektep-ınternaty» ashyldy. 1992 jyly Mınıstrler kabınetiniń 9 shildedegi №587 «Orys tilin tereńdetip oqytatyn jáne áskerı dene shynyqtyrýǵa daıyndaıtyn mamandandyrylǵan mektep-ınternattyń jasaqtalýy men qaıta aty berilýi týraly» qaýlysymen mektep «Respýblıkalyq áskerı mektep» bolyp ózgertildi. Úkimettiń 2003 jylǵy 30 mamyrdaǵy №497 qaýlysymen mektepke Keńes Odaǵynyń batyry Sabyr Raqymov esimi berildi. Al Úkimettiń 2015 jylǵy 26 qyrkúıektegi №789 «Qazaqstan Respýblıkasy Bilim jáne ǵylym mınıstrligi qaramaǵynan Qazaqstan Respýblıkasy Qorǵanys mınıstrliginiń qaramaǵyna berý jáne memlekettik mekemeni qaıta ataý týraly» qaýlysyna sáıkes Keńes Odaǵynyń batyry, general-maıor Sabyr Raqymov atyndaǵy Shymkent respýblıkalyq «Jas ulan» mektebi bolyp ataldy.
Mekteptiń maqsaty – bilimi tereń, daıyndyǵy myqty, shyńdalǵan, áskerı qarý-jaraqty sheber meńgergen, Otanyn, memleket múddesin qorǵaı alatyn azamattar daıarlaý. Ujymnyń basty mindetteriniń biri – tárbıelenýshilerdi otansúıgishtikke baýlyp, bolashaqta áskerı joǵary oqý oryndaryna túsýine kómektesý maqsatynda túlekterdi UBT synaǵyna sapaly daıarlaý jáne joǵary oqý ornynda bilimin jalǵastyrýyna laıyq zamanaýı bilim berý. Osy jyldar aralyǵynda mektepti 3 myńnan astam túlek bitirip, elimiz ben alys-jaqyn shetelderdiń joǵary oqý oryndaryna joldama aldy. Basym bóligi qazirde Qarýly kúshterdiń túrli salasynda eńbek etip keledi. El aýmaǵynda, ózge de memleketterde qapysyz qyzmet atqaryp, mektep abyroıyn asqaqtatyp júr.
Qyryq jyl ishinde mektep túlekteri qatarynan 6 birdeı general, birneshe qoǵam qaıratkeri, kóptegen bıik laýazym ıeleri shyqty. Olar – ulaǵat uıasynyń maqtanyshtary.
Memleket tarapynan qolǵa alynyp jatqan qamqorlyqtyń arqasynda, sondaı-aq demeýshilerdiń kúshimen «Jas ulan» mektebiniń materıaldyq-tehnıkalyq bazasy jyl sanap nyǵaıyp, ulandardyń sapaly bilim alýyna qolaıly jaǵdaı jasalyp keledi. Soǵys jyldarynda óshpes erlik pen qaıtpas qaısarlyqtyń úlgisin kórsetken qazaq batyry, Ortalyq Azııadan shyqqan tuńǵysh general Sabyr Raqymov atyndaǵy mekteptiń tárbıelenýshileri de batyr atasynyń esimine laıyq elimizdiń qorǵany, Otanymyzdyń naǵyz patrıoty bolyp shyǵatynyna senim mol.
Aıken OSPANQULOVA,
respýblıkalyq «Jas ulan» mektebiniń qyzmetkeri
ShYMKENT
