Aleksandra – orys, Roman – koreı ultynyń ókili, ekeýi de – kásibı fotograf. Osydan eki jyl buryn shańyraq kótergen jas otbasy úıde Jańa jyl, Naýryz, Pasha tárizdi dástúrli merekelerdiń bárin atap ótetinderin aıtady.
«Dastarqan ústinen koreı halqynyń bálishi pıgodı men kúrish unynan pisirilgen qytyrlaq nany kadıýrı úzilmeıdi. О́ıtkeni bular – Romannyń eń jaqsy kóretin taǵamdary. Kúndelikti orys ashanasyna tán taǵamdardy da ázirleımin. Al mereke kúnderi mindetti túrde et asyp, baýyrsaq pisiremiz», deıdi Aleksandra.
Platonnyń 1 jasqa tolý qýanyshyna erli-zaıyptylardyń jaqyn týystary men jora-joldastary shaqyryldy. Dastarqan jaıylyp, ortaǵa et kelgen soń, jas otbasynyń jarasymdy turmysy dáriptelip, aq tilekterdiń tıegi aǵytyldy. Otbasy qýanyshynyń eń qyzyqty sáti balanyń tusaýyn kesetin kezde bastaldy.
«О́zim kásibı fotograf bolǵan soń, jurt otbasylyq jıyn-toılarǵa jıi shaqyrady. Maǵan ásirese tusaýkeser rásimin fotosýretke túsirý qatty unaıtyn. Aq kilemniń ústinde aıaǵyn apyl-tapyl basyp kele jatqan sábıdi sýretke túsirgennen artyq eshteńe joq. Qazaqtyń tusaýkeser dástúriniń unaǵany sonshalyq, turmysqa shyqqan soń, ózimniń de kishkentaı bópemniń tusaýyn kestiremin dep sheshtim. Búgin, mine, sol qýanyshymyzdy atap ótip jatyrmyz. Tusaýkeser dástúriniń máni tereńde. Tańerteń biz qonaqtarymyzǵa «asıandı» asyn berdik. Koreı halqynda balanyń eń alǵashqy týǵan kúnin asıandı dep ataıdy, dástúr boıynsha ony saǵat on ekige deıin ótkizý kerek. «A» – bala, «Sıandı» týǵan kún degen uǵymdy bildiredi», deıdi Platon batyrdyń anasy.
Ata-anasy sábıdiń tusaýyn osy kisideı sabyrly, elge qadirli, baı bol dep yrymdap, Romannyń eń úlken aǵasyna kestirdi. Odan keıin shashý shashyldy. Roman men Aleksandra balany eki jaǵynan jetelep, aq kilemsheniń ústimen alyp ótip, aq jolǵa saldy. Kilemsheniń ekinshi basyna otyra ketken Platon shashylyp jatqan zattardyń ishinen avtokólik kilti men tennıs dobyn tańdap aldy.
«Men elimdi, týyp-ósken qalamdy óte jaqsy kóremin. Ulymnyń da alǵashqy týǵan kúni men tusaýkeserin osy balamnyń aldy ashyq, joly jeńil bolsa eken, elimizdi birlik-yntymaǵynan, búgingi berekesinen aıyrmasa eken dep yrymdap, halyq birligi merekesine oraılastyryp ótkizdik», deıdi Aleksandra.
Qostanaı oblysy
