Foto: jambylinfo.kz
О́tken jyly nesıeli bolǵandar arasynda 107 eldi mekenniń turǵyndary bar. Bastama sheńberinde qarjylandyrylǵan 3 iri qus etin óndiretin joba men 34 jylyjaı kesheni bıyl alǵashqy ónimderin beredi. Sonymen qatar ózge óńirlerden 840 mln teńgege 2 359 bas asyl tuqymdy mal ákelinbek. Jalpy, joba aıasynda 713 jańa jumys orny ashylady.
«Amanat» partııasynyń «Aýyl amanaty» jobasy negizinen shaǵyn seh, jylyjaı óndirisi, omarta, balyq jáne qus sharýashylyǵy sekildi jeke qosalqy sharýashylyqtardyń óndiristik jobalaryn damytýǵa baǵyttaldy. Partııanyń oblystyq fılıaly janyndaǵy Ekonomıka, kásipkerlik jáne agrarlyq sektor máseleleri jónindegi óńirlik keńes pen partııalyq baqylaý komıssııasynyń músheleri birlesip, joba sheńberinde iske qosylǵan kásipkerlik nysandar jumysymen udaıy tanysyp otyrady.
Qyzylorda qalasyna qarasty Aqsýat aýyldyq okrýgindegi jeke kásipker Sársenkúl Aralbaeva joba aıasynda ótken jyly 5 mln teńge nesıe alyp, shulyq ónimderin shyǵaratyn qural-jabdyqtar satyp alyp alǵan. Qazir úıiniń aldynan shaǵyn seh ashyp, jumysyn bastap ketti. Kúnine 400 danadaı shulyq shyǵaryp otyrǵan kásipker bolashaqta is aýqymyn keńeıtkisi keledi.
Joba esik aldyndaǵy shaǵyn jylyjaı keshenderin de damytýǵa sep boldy. Qyzylordalyq Nurǵazy Súleımenov aýlasyndaǵy 300 sharshy metr bolatyn jylyjaıda qııar egip otyr. Jeke kəsipker nesıege alǵan qarjyǵa jylyjaı jıyntyǵyn satyp alyp, sharýa bastap ketken. Búginde ónimin aýyl, qala turǵyndaryna satyp otyr.
Manty, samsa, túshpara, kotlet sekildi jartylaı daıyn ónimderdi óndiretin Gúlzıra Ernııazova da –joba qoldaýyna súıengen iskerlerdiń biri. Kásipker «Aýyl amanaty» sheńberinde 2,5 paıyzben 8,6 mln nesıe alyp, karantın kezinde bastaǵan isin keńeıte túsipti. Buryn 2 adam jumys istese, qazir taǵy 3 adamdy jumyspen qamtyp otyr. Qaladaǵy 6 dúkenmen jumys jasaıtyn seh 14 túrli jartylaı daıyn ónim ázirleıdi.
«Aýyl amanaty» sheńberinde 2023 jyly Shıeli aýdanynan jalpy somasy 584 mln teńge bolatyn 79 joba qoldaý taýypty. Sonyń biri – Bıdaıkól aýlyndaǵy qyzanaq óńdeý sehy. «Barly Bai & K» óndiristik kooperatıvin basqaratyn Qanat Musaev 27,6 mln teńge nesıe alyp, shetelden tomat pastasy men konservilengen ónimderdi óndirý jelisin jetkizgen. Jalpy, jobalyq quny 48 mln teńge bolatyn seh táýligine 2 tonna ónim óndire alady. Alǵashqyda synama retinde 25 myń banka tomat pastasy, adjıka, salat daıyndalyp, ónimder sapa sertıfıkatyn aldy.
Jobany iske asyrýǵa kooperatıv múshesi retinde aýyl turǵyndary da úles qosa alady. Olardyń ónimderi sehqa tıimdi baǵamen qabyldanady. «Barly Bai & K» ónimi aldaǵy ýaqytta oblystyń barlyq áleýmettik dúkeninde satylmaq.
Qurylys qarqyny artatyn jaz ben jurt ekken ónimin jınaıtyn kúzde kádimgi qap ta qat taýarǵa aınalyp shyǵa keletini bar. Osydan da jalaǵashtyq kásipker Rústem Qudabaı «Aýyl amanaty» aıasynda nesıe alyp, qap tigetin óndiris ornyn ashqan. О́ndiris oshaǵynyń áleýeti kúnine 10 myń qap shyǵarýǵa jetedi. Qazir sehtan 4 adam turaqty jumys tapqan.
Bir sózben aıtqanda, «Aýyl amanaty» jobasynyń óndiriske óris ashatynyna eldegilerdiń kózi jetti.
Qyzylorda oblysy
