Aýyl sharýashylyǵy mınıstrligi shegirtkemen kúreske drondardy qoldaný jolyn qarastyryp jatyr. О́ńirge jumys saparymen kelgen Aýyl sharýashylyǵy mınıstri Aıdarbek Saparov oblys ákimi Darhan Satybaldymen birge úıirli shegirtkege qarsy kúres jumystaryn júrgizip jatqan merdigerlermen, Keles jáne Saryaǵash aýdanynyń turǵyndarymen kezdesti. Fıtosanıtarlyq is-sharalardyń júrgizilýine 100-ge jýyq tehnıka jumyldyrylady. Mınıstr merdigerlerge kúresti kúsheıtýdi, óńdeýdi der kezinde aıaqtaýdy jáne tehnıka sanyn arttyrýdy tapsyrdy.
Al «EAVISION Robotics Technologies» kompanııasynyń vıse-prezıdentimen birge zııankestermen zamanaýı kúres, atap aıtqanda, drondardy paıdalana otyryp, jándikterdi anyqtaý aýmaqtarynyń monıtorıngin engizý joly talqylandy. Bul bolashaqta jerdi fıtosanıtarlyq óńdeýdi dálirek júrgizýge múmkindik beretini aıtyldy. Marokko shegirtkelerimen kúresýdiń ozyq tájirıbesi shetelde qoldanylyp júr. Atalǵan kompanııa Almaty qalasynda qytaı ınvestorlarynyń qoldaýymen birlesken zerthana ashqan.
Osy oraıda mınıstr bıyl týyndaýy múmkin qıyndyqtardy da atap ótti. Atap aıtqanda, 2024 jyl shegirtkeniń tabıǵı sıkliniń shyńy bolmaq jáne qurǵaqshylyqqa ákelýi múmkin qalyptan tys joǵary temperatýra boljanady.
«Biz qurǵaqshylyq boljamdaryna nazar aýdarýymyz kerek. Klımattyń ózgerýine beıimdelý úshin shuǵyl sharalar da, uzaqmerzimdi strategııalar da kerek. Qajet bolsa, qurǵaqshylyqqa tózimdi sorttarǵa kóshýdi, aýyspaly egisterdi ózgertýdi jáne basqa da sharalardy qamtamasyz etken jón», dedi A.Saparov.
Qazirgi ýaqytta Túrkistan oblysynyń aýmaǵynda marokko shegirtkesine qarsy kúres boıynsha is-sharalar júrgizilip jatyr. Bıylǵy 25 sáýirdegi málimetke qaraǵanda, marokkolyq shegirtke dernásilderi boıynsha 252 myń gektar tekserilgen, 85 myń gektar alqap óńdelýge jatady. Al óńdelgeni – 55 myń gektar. Sondaı-aq shekaralyq aýmaqtarda shegirtke tuqymdastarǵa qatysty jaǵdaı únemi qadaǵalanyp otyr. Shegirtkelerdiń irgeles aýmaqtarǵa kóshýine jol bermeý jáne shekara mańyndaǵy oblystarda qıyndyqtardy boldyrmaý maqsatynda shekara mańyndaǵy aýmaqta birlesken monıtorıngtik jumystardyń josparlary jasalady. Qazirgi ýaqytta О́zbekstan mamandarymen birlesken tekserýler júrgizilip jatyr. A.Saparov aýmaqtyq ınspeksııalardy zııankesterge qarsy sapaly óńdeý quraldarymen qamtamasyz etýdi jáne ony ońtaıly merzimde jasaýdy tapsyrdy.
Drondar men ózdiginen basqarylatyn qurylǵylardy qoldanýmen qazaq-qytaı birlesken kásiporny aınalysyp keledi. Robottehnıkanyń kómegin kórshi óńirlerde dala jumystarynda da paıdalana bastaǵan. Osylaısha, ozyq tehnologııalar kómegimen sharýalardyń jumysyn jeńildetýge múmkindik mol. Qytaı ınvestorlary ókilderiniń qatysýymen aýyl sharýashylyǵy salasyna robottehnıkany engizý úlken suranysqa ıe. Drondar tehnıka bara almaıtyn, adam aıaǵy jete bermeıtin qum, ózen alqaby sekildi jerlerdi zııankesterden ońaı aryltady. Bul qurylǵylar aldyn ala barlaý nátıjesimen, GPS kartaǵa tek zııankestermen kúresý úshin engizilgen jerlerdi týra taýyp, joıady. Flora men faýnaǵa zııandy áseri joq. Mamandar adam qoly jete bermeıtin aýmaqtarǵa ózdiginen basqarylatyn qurylǵylardy paıdalanǵan tıimdi ekenin aıtady. Bir dron bir saǵatta 180 gektar jerge dári sebedi. Osy oraıda mamandar zııankesterdiń tolyq joıylatynyna kepildik berip otyr. Jańa tehnologııany jergilikti mamandarǵa úıretip, kadr daıarlaýǵa daıyn.
Saryaǵash aýdany boıynsha úıirli marokko shegirtkesine qarsy hımııalyq óńdeý boljamy 75,4 myń gektar, onyń ishinde 36,6 myń gektar jerústi búrikkish tehnıkalarymen, 40,8 myń gektardy áýeden óńdeý josparlanǵan. Áýeden óńdeý jumystaryn «Avıakompanııa Delta-Iýg» JShS júrgizedi. Al Keles aýdany boıynsha úıirli marokko shegirtkesine qarsy hımııalyq óńdeý boljamy 62,8 myń gektar, onyń ishinde 34,3 myń gektar jerústi búrikkish tehnıkalarymen, 29,5 myń gektardy áýeden óńdeý josparlanǵan. Bıyl oblysta zııankesterdiń taralý aımaǵy byltyrmen salystyrǵanda birneshe ese ulǵaıyp, 270 myń gektardan asqan. Búginge deıin oblys boıynsha 30 myń gektardan asa alqapta shegirtkeniń oshaqtary hımııalyq jolmen óńdeldi.
Túrkistan oblysy
