Osy óńirden tabylǵan ortaǵasyrlyq jerleý oryndaryna arheologııalyq qazba jumysyn júrgizgen ǵalymdar kóne aınanyń Ejelgi Qytaı qolónershileriniń qolynan shyqqan dúnıe ekenin aıtady.
Kólemi 88 mm bolatyn qola aınanyń shetinde erneýi, ortasynda ıilgen eki balyqtyń beınesi bar. Beti ósimdik beınesindegi órnektermen bezendirilgen. Betki jáne syrtqy jaǵynda matanyń qaldyqtary qalǵan. Mýzeı qyzmetkerleriniń aıtýynsha, aınanyń matadan jasalǵan qaptamasy bolýy ábden múmkin.
«Mundaı úlgidegi aınalar bizge Ejelgi Qytaıdan kelgen. Eń kóne aına Shyǵys Han dáýirine tıesili. Han aınasy quramynda qalaıy bar qoladan quıylǵan. Sondyqtan aına kúmiske uqsap jyltyrap, sáýle shashyp turatyn bolǵan. Sheberler aına quıatyn qalypty saz balshyqtan jasaǵan. Saz qalyptar tez synatyn bolǵandyqtan, bizdiń kezeńge jetkenderi óte sırek kezdesedi. Bizge jetken qalyptardyń kóbi tastan qashalyp jasalǵan. Ǵalymdar kezinde Qazaq dalasynda Han dáýirinen qalǵan qytaı aınalarynyń óte kóp taraǵanyn aıtady. Soǵan uqsatyp aına jasaýshylar da kóp bolǵan», deıdi mýzeı mamany Názıma Otasheva.
Ǵalymdardyń tujyrymynsha, orta ǵasyrlarda aına turmysta ǵana emes, jerleý saltynda da mańyzdy ról atqarǵan. О́ıtkeni kónede aınanyń betine shaǵylysqan sáýleniń jarqyly marqum bolǵan adamnyń o dúnıege baratyn jolyn jaryq qylyp, zulym rýhtardan qorǵaıdy degen nanym bolǵan. Sondyqtan qaıtys bolǵan kisimen birge týystary qabirge aına salyp otyrǵan.
Qostanaı oblysy
