Jón surasa kele qarııanyń 88 jasta ekenin, qalaǵa osydan biraz jyl buryn Fedorov aýdanyna qarasty Ýkraın aýylynan kóship kelgenin, kóp jyl aýyl sharýashylyǵy salasynda jumys istegenin, zeınet demalysyna shyqqaly temir kesip, ustalyqty kásip etip júrgenin bildik. Aldyndaǵy jurtqa kerektiń bárin qystaı daıyndap alady da, kóktemde satýǵa shyǵarady eken.
«Ákemniń qoıǵan aty – Ǵınaıat, al jurt Qaztaı dep qana biledi. Tegim – Nurpeıisov. Osy jasqa deıin istemegen jumysym joq, shyraǵym. Sanasań, on saýsaǵyń jetpeıdi. Buzaý baqtym, buqa baqtym, jylqy da baǵyp kórdim, esepshi bolyp istedim, traktor, avtokólik júrgizdim, garaj meńgerýshisi, garaj mehanıgi, jylqy zaýytynyń mehanıgi boldym. Jasym qazir 88-de, 60-ta zeınetke shyqtym. Sonda da áli damyl kórgen joqpyn. Úıde otyryp birdeńe istesem kishkene kóńilim jaılanyp qalady. Al jatsam aýyryp qalamyn. Mynanyń bárin qys boıy jasap shyqtym. Bárin saıajaıǵa alyp jatyr. Bir maýsymda 500-600-i ketip qalady. Árqaısysyn 1,5 myńnan eseptep kór, 900 myń teńge bolady. Munyń bári – aradan istelgen óte sapaly dúnıeler. Jaı temir emes. Tasqa ursań da júzi maıyrylmaıdy. Meni jarty Qostanaı biledi. Jurttar ádeıi izdep kelip alady», deıdi aqsaqal.
Ǵınaıat qarııa qystaı ustalyq etedi eken. Qaladaǵy metall qabyldaý oryndarynan eski aralardy satyp alady da, úıge ákep kesip-kesip aramshóp otaǵysh jasaıdy. Mysaly, eki kisilik bir qol aradan 50-60 shóp otaǵyshtyń basy shyǵady eken. Sonyń bárin aqyryndap shetinen egep, qaırap, dánekerlep, saptap qoıady. Al kóktemde bazarǵa shyǵyp, maýsymnyń jıyrmasyna deıin týra eki aı otyrady.
«Meniń taýarym «Skladskoı» bazaryndaǵy qańyltyrdan istegen qytaıdyń zattarynan anaǵurlym sapaly jáne kóp arzan. Sondyqtan jurt baǵamdy da, taýarymdy da maqtap alady, biledi ózderi. Úlken ketpen istemeımin, aýyr nárse. Maǵan osylar jetip jatyr. Jurt rahmetin aıtyp ketedi. Qolym áli damyl kórgen joq, 13 jasymnan eńbekke aralastym. О́ziń sanap kór, 75 jyl bolypty jumys istegenime. Allaǵa shúkir, sonyń arqasynda densaýlyǵym da kishkene jaqsy. Biraq kóz qalyp barady, qulaq bitti. Kárilikke qarsy eń paıdaly dári – eńbek», deıdi usta.
Ǵınaıat qarııa baý-baqsha quraldaryn tek asyl temirden ǵana jasaıdy. Sondyqtan ustanyń qolynan shyqqan ótkir zattardyń júzi ońaılyqpen muqala qoımaıdy. Ásirese kúz kelip, kún sýytqansha baý-baqshadan shyqpaıtyn zeınetkerler men áıel adamdarǵa asa qolaıly. Osyny biletin biraz jurt qart ustany ádeıi izdep kelip, arnaıy tapsyrys berip ózderine kerek quraldyń syzbasyna deıin ustatyp ketip jatady.
«Shyraǵym, densaýlyqqa paıdaly bolǵan soń júrmin. Jatsam jatyp qalamyn. Kúniń kisige qaramasyn, kúni kisige qaraǵan adamnan Alla teris aınalady. Áıtpese, aqsha tappaı otyrǵan shal emespin, memleket zeınetaqysyn berip, ózi asyrap jatyr. Úsh balam jumys isteıdi, nemerelerim bar, táýbe. Elimiz tynysh, jurtymyz aman bolsa, bizdiń tilegimiz – sol», deıdi qarııa.
Qostanaı oblysy
