Osyǵan oraı uıymdastyrylǵan Fızıka-tehnıkalyq fakýltetiniń 15 jyldyǵyna arnalǵan «Ǵylym jáne bıznes: damý joldary» atty dóńgelek ústel barysynda yntymaqtastyq týraly memorandýmǵa qol qoıyldy. Ýnıversıtet pen «S.Kırov atyndaǵy zaýyt» aksıonerlik qoǵammen yntymaqtastyq týraly kelisimge kelgeniniń nátıjesinde izdenýshiler aqysy tólenetin taǵylymdamaǵa qabyldanatyn boldy.
Eýrazııa ulttyq ýnıversıtetiniń strategııalyq damý jónindegi prorektory Dýman Aıtmaǵambetov: «Memorandýmǵa qol qoıý – ǵylym, bilim jáne óndiristik ıntegrasııa salasyndaǵy strategııalyq mańyzdy qadam. Biz yntymaqtastyq sheńberinde birlesken ınnovasııalyq jobalardy iske asyrýdy, sondaı-aq stýdentterdi óndiristik bazada tájirıbeden ótkizý arqyly joǵary bilikti kadrlardy daıarlaý jumystaryn júrgizýdi josparlap otyrmyz. Memorandým el ıgiligi úshin ǵylym men óndiristiń odan ári baılanystaryn nyǵaıtýǵa berik negiz qalady dep senemin», dep atap ótti.
Al atalǵan ýnıversıtettiń «Radıotehnıka, elektronıka jáne telekommýnıkasııalar» kafedrasynyń meńgerýshisi Qanat Mahanov «RFID júıesi úshin dóńgelek polıarızasııalanǵan antennany jobalaý» jobasyn júzege asyryp jatyr. Ǵalym ǵylymı zertteýlerin júzege asyrý barysynda qajetti zattaryn osy zaýyttan satyp alady. «Biz zaýyttan ózimizdiń zertteý jobamyz úshin baspa platalaryn satyp aldyq. Sebebi olardyń bul ónimi joba sheńberindegi talaptarǵa tolyq sáıkes keledi. Bolashaqta biz óz ýnıversıtetimizde jobanyń alǵashqy nátıjelerin engizý boıynsha ǵylymı yntymaqtastyqty odan ári damytamyz», dep túsindirdi ǵalym Q.Mahanov.
S.Kırov atyndaǵy zaýyttyń bas dırektory Almas Nurmaǵambetov temirjol, munaı-gaz, energetıka salalarynda paıdalanýǵa arnalǵan 100-den astam ónim túri shyǵarylatynyn jetkizdi. «L.N.Gýmılev atyndaǵy Eýrazııa ulttyq ýnıversıtetimen ıntegrasııany nyǵaıtý biz úshin úlken mańyzǵa ıe. Yntymaqtastyǵymyzdyń birinshi kezeńinde aqysy tólenetin tájirıbege qabyldaýǵa daıynbyz. Stýdentter tegin tamaq pen jatyn orynmen qamtamasyz etiletin bolady. Sonymen qatar yntymaqtastyǵymyzdyń aıasynda Eýrazııa ulttyq ýnıversıtetiniń fızıka-tehnıkalyq fakýltetine 5 kompıýter syıǵa tarttyq. Alda kóptegen jospar, joba bar. Birlesken jumys nátıjeli bolady dep úmittenemiz», dedi spıker.
