Bıylǵy naýryz aıynda óńir basshysynyń birinshi orynbasary Serik Batyrǵojınovtyń ótken jazda eki balanyń anasyn zorlaǵany týraly aqparat tarap ketken edi. Laýazym ıesi bul aıyptaýmen kelispeı, áıeldiń ústinen quqyq qorǵaý organdaryna shaǵym túsiredi. Pavlodar oblysynyń polısııa departamenti onyń ótinishine sáıkes bopsalaý faktisimen qylmystyq is qozǵady. Atalǵan is boıynsha tergeý is-sharalary júrgizilip, keıin is sotqa jiberildi.
Pavlodar oblysynyń qylmystyq ister jónindegi mamandandyrylǵan aýdanaralyq soty alqa bılerdiń qatysýymen K-ǵa qatysty asa iri mólsherde bopsalap, aqsha faktisi boıynsha qylmystyq isti qarady.
Belgili bolǵandaı, áıel jalǵyzbasty, otbasynda múgedek bala tárbıelep otyr. Soǵan baılanysty byltyrǵy sáýir aıynan turǵyn úı alýǵa kezekke turǵan. Ol áleýmettik jelide S.Batyrǵojınovpen tanysyp, onyń qabyldaýynda bolǵan. Keıin jaqyn aralasa bastaǵan. 2023 jyldyń mamyr-qyrkúıek aılary aralyǵynda Batyrǵojınov K-ǵa materıaldyq kómek túrinde 50 myń teńgeden 160 myń teńgege deıin aqshalaı qarajat aýdarǵan. Áıel bara-bara aqsha suraýdy údete túsip, onyń bedelin túsiretin aqparatty taratamyn dep bopsalaǵan. Sóıtip, óz esepshotyna jalpy somasy 4 812 000 teńge aýdartyp alǵan kórinedi. Al ótken jyldyń qarasha aıynda 20 mln teńge talap etken.
Alqabıler K-ny Qylmystyq kodekstiń 194-babynyń 4-bóligi 2-tarmaǵy boıynsha kináli dep tanydy. Sot áıeldiń buryn sottalmaǵanyn, asyraýynda kámeletke tolmaǵan balasy bar ekenin jáne jeke basynyń aýyr jaǵdaılarynyń jıyntyǵy boıynsha qylmys jasaǵanyn eskere otyryp, Qylmystyq kodekstiń 55-baby 4-bóliginiń negizinde oǵan 3 jylǵa bas bostandyǵynan aıyrý jazasyn taǵaıyndady.
Pavlodar oblysy
